Tunlaia fur ruahtui sur nasat avangin Mizoram hmun hrang hrangah chhiatna a thlen nual a, mihring chenna in leh kawngpui hmun hrang hrangah leiminin a tichhia a; Sairang leh Hortoki Tlawng kama nul siamte thlai chinna hmun pawh a chim deuh vek tawh. Khawchin hrilhlawktute’n ningani thleng dang khua a cheng zui dawn niin an hrilhlawk bawk.
Ruah sur nasa hian hmun hrang hrangah lei ti minin, lui hrang hrang te a len phah nasa a. Aizawl khawpui panna pawh hmun engemawzatah leimin avangin a ping a, Aizawl chhung veng tinah leimin report a awm bawk a, hetihlai hian he thu buatsaih lai hian chhiatna thleng avanga nunna chan erawh an la awm lo.
Inrinni khan Tuikhurhlu vengchhaka Lalthuamliana In Assam type chhawng 4 chu a bula retaining wall chimin a pawt chim a, thi leh hliam an awm lo.
Nimin khan Serchhip leh Chhiahtlang inkar NHDICL-te kawng laih mekah kawngchhuat dawlzawlna tura Retaining wall an siam thenkhatte a chim a. Keitum khawdai ah Aizawl kal tur Bike pakhat chu, kawngchhak lung tlain a delh a, hliam tuar leh nunna chan erawh an awm lo a ni.
Serchhip leh Hriatlang inkar kawngpui chu Tuichawm lui (Hriangtlang ram lam) a saberekakhuangkaih-in a tihchhiat vek avangin mihring leh lirthei eng chi kal pawh theih lohin an awm mek bawk a ni.
Kolasib District chhung Bilkhawthlir leh Buhchangphai inkar kawngpui NH-154 huamchhunga Phaipheng zau ah leiminin kawng a hnawh avangin nimin tlai thleng khan lirthei eng chi mah a kaltlang thei lo.
Tunhnaia ruah sur nasa avangin Tlawng lui pawh a len belh a, hei vang hian Hortoki leh a chhehvel-a Tlawng kam nul siam te a tibuai nsa hle tawh a; thlai chin te tui-in a chim tawh.
Hortoki khawtlang hruaitute’n THE ZOZAM TIMES an hrilh danin, tlawng tui lian hian a vela leileta buh chin te pawh a chim vek avangin a chhiat vek a rinawm tih an sawi a,nimin chawhnu thleng khan Nul huan neite Thlam 9 lai chu Bungrua pawh chuh hman loh-in tui lian hian a lenbo sak a, Thlam engemawzah chu a chim tan leh mek tawh tih an sawi.
Tlawng kama awm Sairang khua chuan a tul thut huna inthiar chhuak thei turin an inring tan a, Sairang Branch YMA hruaitute’n THE ZOZAM TIMES an hrilh danin, Tlawng lian zel avang hian lui hnaia awm in hnih chu a ban te a chim tan tawh a, in pakhata cheng te chu nimin khan an in thiar chhuak.
Sairanga tlawng lui hi Pathianni zing atang khan a lian zual tan a, Tlawng kama Antam nul siamna hmun pawh a chim deuh vek tawh a. YMA hruaitute chuan, chhungaw 100 chuang nul hmun a chim tawh a, limbu huan 50 bawr vel pawh a chim tawh nia an hriat thu an sawi a ni.
Regional Meteorological Centre, IMD, Guwahati in khawchin a thlir lawk danin, ningani thleng khian Mizoram hmun tin(most places i.e., 76%–100%)ah ruah sur theihna chance 50%–75% a awm.
Warning: Pathianni leh Thawhṭanni hian Mizoram hmun tlemte(isolated places i.e., 1%–25%)ah ruah leh thli thawh theihna chance 50%–75% a awm.