Social media lamah thil thleng duhawmlo puanzar ruala thlalak leh video en nuam lo hmuh tur a awm leh zauh thin. Mi hliam tuar leh ruang thlalak leh video te hi a lo hmu tu tana tangkai lo, vanduaina tawk chhungte leh thian te thleng pawha nakin thlenga an natna belhchhahtu mai a nih theih avangin thlalak/video post leh midang post putdarh kawngah te, a thlalatua tan kawngah te fihlim tum a tha viau mai. Tin, mihring zia, rilru leh hriselnate a inchen lova, thlalak/video en hrehawm deuh te hian nghawng tha lo a nei palh theih bawk ang.
Chhiatna thleng a awmin, a tuartu chhung te emaw an thian hnai te emaw, khawtlang hruaitute leh YMA lam hruaitute pawh phone call emaw hmaichhanah emawa an chhiat tawh chungchanga kawma, record-a a ngai ngaia theh darh leh mai thin pawh an awm leh thin, sim atan a tha khawp mai. Thu kan lo zawtfiah ve a nih pawhin mipui hriata puanzar tur chin thliar thiam tur a ni.
Chhiat tawh sarhu lai chuan sawi awm leh sawi awm loh te thliar a har a, an sawi duh hauh loh tur te pawh an lo sawi palh thei. Thil thlen dan chiang taka sawi mai te a har thin, belhchiandawl lutuk lo deuh te pawh a sarhu lai chuan sawi palh theih a nih avangin thil thleng te mipuia puanzar awm chin thliar thiam leh puanzar dan thiam a tul.
Pawikhawihna thleng a awmin, pawikhawihtu chu chiang thawkhat mahse, court-in thiamloh a chantir hma chuan pawikhawihtu ni lovin, pawikhawihtua puh an nih avangin mipuia puanzarna lamah pawh pawikhawihtua puh’ tih a him.
Tin, pawikhawihtua puh hming kan ziak/puanin an nu emaw pa emaw, an nupui/pasal hming te police leh court lam record-ah ziahlan ni mahse, pawikhawihnaah inhnamhnawihna neia puh tel an nih ve loh chuan mipui hriata puanzar tel ve loh a tha. Kumtlinglo leh hmeichhe inhnamhnawih telna ang chi puanzar kawngah phei chuan fimkhur hle tur a ni.
Youtube leh social media dang hrang hrang hmanga chanchinthar te kan puang ve thin dawn a nih chuan dan leh a kaihhnawih hriat tel tur pawimawh hrang hrang te hre hmasa tura inzir ve a fuh. Thlirtu neih tam theih na tur ngawt ngaihtuaha chanchin- thar kan lo puang ve mai thin a nih chuan a dik lovang.
Chanchinthar puanzar ran aiin chanchinthar rintlak leh him puanzar ngaihpawimawh zawk a fuh. Chanchinthar kan ziak/puanna tawng chu eng hnam tawng pawh ni se, tawng hman dik ngaihpawimawh a tha bawk.