Vawk pul hri, African Swine Fever (ASF) lengin Mizoramah ziaawm lam a la pan lova. He hri leng thawhhnihna kumin kumtir lam atanga leng leh avangin Inrinni thleng khan Mizoramah Vawk sang nga chuang an thi leh tawh.
AH & Vety Dept-in a chhinchhiah danin, Inrinni kaltaa ASF vanga Vawk thih belh 93 leh ASF kai nia rinhlelh Vawk 81 suat te nen ASF thawhhnihna avanga Mizorama Vawk thi zat 5488 leh hri kai nia rin Vawk suat 4636 an ni.
Hetih lai hian Mamit Luangpawl Vengah National Highway kawng kam kawra Vawk thi paih a nih avangin Luangpawl VC-in Inrinni khan Mamit Police station-ah FIR an thehlut a. Mamit-ah hian Vawk pul hri lengin zual lam panin, Vawk thi pawh an pung zel a, Vawk thi te phumna turin Mamit joint VC-in Zo-ngaw-ah Vawk thlanmual a ruahman a, chutah chuan Vawk thi te phum thin an nih laia khaw chhung kawngkama Vawk thi paih chu mihring leh ran tan pawh him lova an hriat thu Luangpawl VC te chuan an sawi.
Luangpawl VC te chuan kawra Vawk thi paih chu district bawrhsapin Vawk thi sawngbawl dan chungchanga thupek a chhuah bawhchhiatna a nih thu sawiin, Vawk thi paihtu zawng chhuaka dan hmanga hrem turin Mamit police te chu an ngen tih an sawi bawk.