Aizawl: BJP Mizoram State Media Team chuan Nilaini khan Seling tlang dunga NHIDCL hnuaia kawngpui siam hna thawh mekte enfiahin an tlawh a, a hun taka zawh a nih theih nan state sorkarin a tih tur a tih ve a ngai nia an hriat thu an sawi.
NHIDCL hnuaia contractor-ten Mizorama hmasawnna hnathawh mek chu a hun taka zawh a nih theih nan Mizoram sorkar hian kawng laih a nih dawn avanga kawngpui bula in ding laite thiat tura an tih, compensation pawh la vek tawh tun thlenga in thiat duh lo an awm avanga hna thawh hleihtheih lohna hmun awmte enfiah a, a rang thei ang bera inte thiat tura hma la turin an ngen tih an sawi.
BJP Mizoram State Media Team chuan spoil bank hmunhmate leh hmun thenkhata lei vung paih dante enfiah nghal bawkin, siam that ngai awmte siam tha turin NHIDCL hotute an hriattir nghal.
Tun hnaia Tuikhurhlua in chim chungchangah thil awm dante enfiahin company leh in nei tute kawmin, thuneitu sang zawkah an kawmna report-te pe leh turin an ruahman a ni.
NHIDCL Executive Director Officc-ah lengin Mizorama NHIDCL hnuaia kawng siamte chu uluk taka enfiaha a hun taka hna thawh zawh a nih theih nan hma chak taka la turin an ngen bawk.
BJP Mizoram State Media Team hi BJP Mizoram Pradesh State Spokesperson K Laldinthara’n a kaihruai.