Foreign player manto taka chah luh an awm lova, vawi leh khata offense leh defense a danglamna siam nghal thei an nei lo chungin Chawnpui Basketball Club in tanrual an chakpui teuh a. Tuikual South Basketball Club lakah Nilaini zan Mizoram Super League inkhelah 64-60 in an tlawm.
Tun season MSL-ah Chawnpui hian Mizo hlangin inelna an hmachhawn a, team dangte angin sum an seng nasa thei lo.
Match ruk atang a vawi ruk nan an tlawm a, amaherawhchu an inkhel thlir a, point an score te thlirin anni aia player malkhai a lak a tha zawk leh langsar zawk nen an inthlauhna a tam ngai lo.
TKS lakah hian Laltlanhlua leh Zodina Chawngthu ten point 14 ve ve an score a, rebound vawi 7 la Tlanhlua a tangkai thin.
Vanlalhriatpuia chuan point 13 a score bawk a, anni pathum ni lo offense lama awmze nei tham a point score thei dang pakhat awm belh se inkhel a danglam thui thei ang.
RVL Lalhriatrenga leh Lalrinhlua te an tangkai bawk a, rebounds lakah leh defense khelh lamah an team tan court a an awmin an thawkrim.
TKS innghahna chu Darrell Bowie leh bawk a ni a, point 19 leh rebound 16 a la. Dennis Lalmuanpuia chuan point 13 leh rebound 10 a la ve bawk.
Ningani tlai inkhel hmasa zawkah Thawhlehni zana overtime a chak Khatla TBL an chak nawn thei lova. Mission Veng Hotshots in 84-78 in an hneh.
Hotshots tan Josua Aaron Keyes chuan point 32 leh rebound 15 a la a, Eddie Zaithanmawia chuan point 23 leh rebound 10 la in K. Lalfakzuala’n point 13 a score.
Khatla TBL tan Levi Bradley Jr. leh Vanlalthazuala ten point 22 ve ve an score thung.