Zirlai ti thate hnenah Chief Minister’s Award

Aizawl: School Education Department-in kumina HSLC leh HSSLC result chhuaka topper-te hnenah nimin khan Chief Minister Award an hlan a, thuziak leh tangkafai Rs. 50,00 theuh hlan an ni.

He huna khuallian, Chief Minister Zoramthanga chuan lehkhathiamna chuan eizawnna tha nei thei turin thiamna a pe a, eizawnna piah lamah mihring hman tlak, ngaihtuahna changkang a thlen theih thu sawiin, hengte nei thei tur chuan ruihhlo laka fihlim a tul thu a sawi.

Ruihhloin khawtlang nun a tibuaizia sawi chhunzawmin, “Zu kaihhnawih natna a tam lutuk leh HIV positive an tam lutuk tate hi a pawi a, ruihtheihthil hi kan phek do a ngai a ni,” a ti a, zirlai kalkhawmte chu zu leh ruihhlo, zuk leh hmuam laka fihlim tlat turin a chah.

Education Minister Lalchhandama Ralte pawhin thu sawiin education huang chhungah infrastructure leh thil dang dang tihhmasawn a tihchangtlun ngai hmabak tam tak a la awm thu sawiin, zirna chu hmun sang an chantir chuan kalkawng dik ramin a zawh dawn tih a sawi.

Chief Minister’s Award dawngtute hi HSLC topper-te – Dinsawmkimi St. Joseph’s HSS leh Lalramdina Ralte, St. Paul’s HSS te an ni a. HSSLC (Arts) topper Lalrohlui Ralte, Synod HSS, commerce stream topper Mercy Laltlansangi, Oikos HSS leh Science stream topper Simon Lalremsiama Shangpliang, St. Paul’s HSS te an ni.

Leave a Reply

error: Content is protected !!