Aizawl: Mizoram Assembly House leh a chhehvela thil zuarte sawnna tura Aizawl Municipal Corporation (AMC)-in Tuikual South-a bazar building a sak chu nimin khan Aizawl Mayor Lalrinenga Sailo-in a tlawh.
Aizawl mayor chuan Mizoram rorelna sang ber, Mizoram Assembly House bul kawngsirah phalna pek ni lo thil zuar an tam hle a, hei hian assembly house himna leh zahawmna atana pawi thei a nih avangin mumal zawka kalpui a tul avangin AMC hmalaknain chawhmeh leh thil dang zuartute awmna tur building chu sak a nih tak thu a sawi.
He building sakna sum hi AMRUT fund leh AMC sum hmanga sak a ni a, Rs. nuai 1,013 vel sen a ni dawn tih mayor chuan sawiin, building hi sak zawh tep a ni tawh tih leh hun reilo teah tangkai taka hman tan theih beisei a nih thu a sawi a ni.
AMC building hi chhawng sarih a ni a, a chhawng 4-na leh 5-na hi thlai zawrhna hmun tura ruahman niin chawhmeh zuar 171 leng thei tura siam a ni.
A chhawng hnuai pathumte hi motor park-na tura ruahman niin, car 35 leh two-wheeler 35 leng tura duan a ni.
Chhawng 6-na hi shopping area tur niin hetah hian shop (dawr) 17 a awm thei dawn a; chhawng 7-na, a chhawng chung ber hi auditorium/hall tura ruahman niin mipui 200 thut theihna tura duan a ni bawk.
AMC building tlawhtu Aizawl mayor hi Dy. Mayor R. Thanglura, Executive Councillor pahnih – B Lalawmpuii leh Lalringliana te bakah AMC official-ten an tawiawm a ni.