Court of Special Judge (Prevention of Corruption Act)-in Kau-Tlabung leh Tuipanglui Mini Hydel Project siamna sum eiruk thubuaiah P&E engineer pakhat leh supplier chu thiam loh chantirin, kum hnih chhung lungin tang tur leh Rs 3,63,000 ve ve chawi turin a hrem.
Court judgement-a a lan danin kum 2008 khan PRISM hruaituten Kau-Tlabung leh Tuipanglui Mini Hydel Project siamnaah leh Re-revised estimate siam danah thil dik lo leh pawisa hman dan dik loh a awm nia ngaiin Anti Corruption Bureau-ah complaint an theh lut a, he thubuai kal zelah Kau Electrical sub-division, Thenhlum huam chhunga hman tur ‘Chain Link Wire’ supply-na tur sum Rs 7,26,000 chu eiruk a ni.
Thuremnaa a lan danin supplier challan-a an ziah lannaah kum 1999 khan Kau Electrical Sub-division, Thenhlumah ‘Chain Link Wire’ roll 66 chu an thawn a, khatih laia Kau Electrical Sub-division SDO Laldawngliana’n kum 2001 khan P&E SE Lalnunmawia Sailo hnenah ‘Link Wire’ an hman tangkai thu leh hemi man hi supplier hnena pek a la nih loh thu lehkha a thawn a, hmanraw man, Rs 7,26,000 chu Serchhip Power Division-in April 2, 2001 a pe chhuak.
‘Chain Link Wire’ man pek chhuah a nih tawh lai hian hetih hunlaia Kau Electrical Sub-division, Thenhluma awmte erawh ‘Chain Link Wire’ hi an dawn an hre lo a, a dawngtu pawh an hre hlawm lo tih court thuremna chuan a tar lang.
Court chuan thuhretute thusawi leh documents court-a awm hrang hrangte ngun taka a ngaihtuah hnuah SDO ni thin, Laldawngliana leh M/S R.P Processing Unit neitu, Swopan Kumar Roy te chu thiam loh a chantir a, sum an eiruk Rs 7,26,000 chu a zat ve, Rs 3,63,000 ve vein a chawitir a, kum hnih chhung lungin tang turin a hrem bawk.
Thiam loh chantirte hian an sum chawi tur hi nimin khan court-ah an pe nghal a, high court-a zualkona hun siamsak niin, bail-a chhuahtir nghal an ni.
He thubuaia eirua puh tel, khatih hun laia P&E SE (Transmission Circle) Lalnunmawia Sailo erawh a thiam lohna chiang tawk taka finfiahna a awm loh avangin he case atang hian zalentir a ni.