Prime Minister Sheikh Hasina chuan Padma River chunga dawh, an khawpui, Dhaka leh an ram chhim lama la hnufual tak tlawhpawhna tur lei chu a hawng.
He lei hi ei rukna tam tham tak a awm nia hriat a nih avanga rei tak tihkhawtlai a nih hnu leh World Bank pawh an inhnuhdawh hnuah puitlin a ni thei ta a. $ tluklehdingawn 4 dawn senna a ni.
Inrinnia Padma Bridge-a hawn ta hi Bangladesh-a lei sei ber tur niin ‘an ram tana chhuan tur thil’ a nih thu Hasina chuan a sawi.
Km 6.15-a thui leh hi November, 2015 atanga a dawh hna thawh tan niin Dhaka leh an ram chhimthlang lama district 21 zette kawngpui leh rel hmanga tlawhpawhna tur a ni a. Zin chhung pawh tirei lo sawt thei tur a ni.
Thir hmanga siam lei hi a chungah a ruala lirthei pali tlan theihna kawng awmin a hnuaiah rel pakhat tlankawng a awm bawk.
$ tluklehdingawn 3.87 man niin Bangladesh-a hmasawnna hnathawhah chuan a man to ber niin a vai hian Bangladesh sorkar tum a ni.
Kum 2012 khan World Bank chuan $ tluklehdingawn 1.2 a puktirna tur chu eirukna a awm nia hriat a nih avangin a lo hnukdawk a. He thil avang hian Asian Development Bank (ADB) leh Japan International Cooperation Agency (JICA) pawh an inhnuhdawh zui ve phah.
Ram dang atanga sum an hmuh theihte kiang mah se Hasina-i chuan anmahni sum hmang pawha dawh zawh ngei tumin tan a la zui a ni.
A thutlukna siam hi an ram eibar dinhmun nena enin politics-a amah eltute chuan an sawisel nasa hle a. Ram dang atanga puihna tel lova hetiang hna lian an la thawh ngai loh bawk avangin beihna a tawh nasat phah zual hle.
“Mi thenkhat chuan mi dang rinchhan turin thil an sawi thin a; mahse, Father of the Nation Bangabandhu Sheikh Mujibur Rahman chuan mahni intizahawmna a pawimawhzia min zirtir a ni,” tiin Inrinnia a hawnnaah hian Hasina chuan a sawi nghe nghe.
Sheikh Rahman-a hi Bangladesh ram dintu niin kum 1971 khan Pakistan atangin an ram hi a sual chhuak a ni.
“Padma Bridge hi leirawhchan leh cement inrem mai a ni lo va, Bangladesh theihna, zahawmna leh inchhuanna a ni,” tiin a sawi.
“Kan tihtheih hi khawvel hmaah kan tilang a ni,” a ti bawk.Padma Bridge a hlu dawn hle
Dhaka atanga km 68 vela hla, Padma Bridge hi an ram chhimthlang lamte tan chuan luhkapui a ni dawn a, Dhaka leh heng lai vela district lian tak takte inkalpawhna kawng titawitu tur niin heng zingah hian Khulna, Jashore leh Barishal district-te pawh a tel.
Chhimthlang lam district leh Dhaka inkalpawh nana hun hman thin chu darkar 15 atanga 22 vel zetin a titawi dawn a, km 180-300 velin a tawi dawn tihna a ni.
Dhaka leh Bangladesh-a lawngchawlhna khawpui lian ber pahnihna, Mongla inkar pawh km 100 velin a titawi dawn bawk.
Sorkar hnuaia awm Bridge Division-in a chhut dan chuan Padma Bridge hian ni tin lirthei 2,620 vel zette zinkawng darkar 1,87,727 a hum thei dawn niin a sawi a. Ni tin lui hi lirthei 24,000 velin an kân ziah dawn angin an chhut a, tuna ni khata lirthei 2,620 chauhvin an kân thin chu a pung hle dawn tihna a ni.
Lei thar hmanga awlsam taka bungrua leh mihring vei vel a awlsam dawn tak avang hian an ram chhim lamin sum an thawh chhuah pawh 2.5%-in a kâng thei dawn niin an chhut a, an ram pum sum thawh chhuah pawh 1.23% chuang mahin a tipung dawn niin an chhut bawk.
Sangha man leh lo nei tamna ram awlsam zawka tlawhpawh theih turin kawng hrang hranga an hlawkpui beisei a ni.