Chanmari Vikings in Mizoram Super League season 7 a Play In khelpha turin dinhmun thaah an indah a, Zirtawpni zanah hnehna pawimawh tak ni thei tur an chang.
R. Dengthuama Indoor Stadium-ah Vikings hian table mawng a awm Chawnpui BC an hmachhawn a, 72-58 in hnehna an chang.
Chawnpui hian first quarter-ah point nga in hma an hruai hman a, mahse an chetthat chu an chhunzawm thei lo. Vikings in chungnung zawk chan chang tluanin a tawp thlengin buaina an nei tawh lo.
Vikings tan Raymond Miller Jr. bawk a che pui leh a, point 40 a score bakah rebound 22 a la a. Lalruatpuia chuan point 12 a score.
Inrinni zanah Chawnpui BC an inlan lehnghal a. Zarkawt BCA in 126-80 in an hneh.
Quarter hmasa pathumah chungnung takin Zarkawt BCA in hma an hruai a, an khingpuite nen point an score theih zawngah an inthlau.
Zarkawt BCA tan Joseph Allen leh Zonunsanga ten point 38 leh 26 an score a. Lalrina Renthlei chu a khaipa berah tangin point 10, rebound 11 leh assist 13 neiin triple double a nei.
Mission Veng Hotshots pawh an che tha chhunzawm a, 102-81 a Tuikual South hnehin pahnihnaah an awm.