Maharashtra-a tangrual sorkara a khaipa ber Shiv Sena party chhunga an MLA-te helna chu a lian zel a, hel lam chuan pun lam pan zelin Higher & Technical Education Minister Uday Samant pawhin Pathianni khan a zawm leh nia sawi a ni.
Samant-a hi biakpawh theih lohva a awm hnuah Surat atangin Guwahati-a MLA helte inkulh mekna a pan leh nia sawi a ni.
Airport services company-in Guwahati pan tur ‘passenger manifest’ an tihchhuahah pawh Samant-a hming hi a tel a, he lehkha hi social media-ah a darh nasa hle.
News agency ANI pawhin thlawhnaa a chuang tur thlalak chu Twitter-ah an thehdarh bawk.
Samant-a’n hel lam hi a zawm leh a nih chuan cabinet minister Gulabrao Patil, Dada Bhuse leh Sandipan Bhumre minister of state Shamburaje Desai leh Abdul Sattar te chuan an zawm tawh tihna a ni.
Heng bakah hian Prahar Janshakti Party atanga minister, Bachu Kadu leh independent minister Rajendra Yedravkar pawhin Sena atanga hel, Eknath Shinde-a lam hi an zawm tawh a ni.
An thawhpui, Nationalist Congress Party chief Sharad Pawar chuan Pathianni khan an thawhhona, MVA-a hruaitute chu a thutkhawmpui bawk.
Hetah hian NCP hruaitu, Congress minister Balasaheb Thorat leh Ashok Chavan leh Sena hruaitu Anil Parab leh Anil Desai te chu an tel.
Maharashtra-a hian Sena mi leh sate chuan an MLA helte duh lohna nasa takin an lantir mek bawk a. Pathianni pawh khan Mumbai leh Pune bakah khawpui dangah an lantir leh.
Sena President Uddhav-a fapa, minister tho, Aaditya Thackeray leh an party thupuangtu, Sanjay Raut te chuan Mumbai dai, Dahisar-a Shinde-a leh a hote duh loh lantirtute chu hun an hmanpui.
Raut-a chuan tuna hel an awm chu Sena thawhlehna tur a nih thu sawiin, “Min ring tlattute hnen atangin thil kan zir a, heng mite thlarau hi a thi a, mi 40-te hi Assam atanga lo kalin an ruang hi endik a ni ang,” tiin Guwahati-a Shinde-a hova inkulh mek an party MLA-te chungchang a sawi.