Mizoram a volleyball infiamna a thuneitu Mizoram Volleyball Association chuan term thar atana hruaitu turte an thlanna Zirtawpni khan an nei.
A vawi thum nan MVA president atan thlan tlin a nih hnuah Dr Lalmalsawma Nghaka chuan Mizo player, coach leh referee-te rahbi thar kaipui ngei a tum thu a sawi.
BS Farm, Falkland, Aizawl ah 2022 atanga 2025 chhung MVA office bearer tur mi pariat tlan chhuah an ni a, President atan Senior Vice President ni lai Dr. Mala a tling a, Er. H Lalzirliana thlakin kum thum chhung a kaihruai dawn a ni.
Kum khat chhung Aizawl District Volleyball President a nih hnuah 2013 khan a vawi khat nan MVA President atan thlan a ni a, 2016 atanga 2019 chhung atan tling nawnin kum kal ta kum thum chhung a awl hnuah Dr .Mala a tling leh.
"Chona thar kan hmachhawn turah Mizoram atangin India aiawha khel phak international player an chhuah ngei theih nan hma kan la dawn a; khairual taka hmasawnna a thlen theih nan India team squad-ah Mizo coach an awm leh theihna tur bakah, Mizo international referee hmasa ber an chhuah theih nan theihtawp chhuah ngei ka duh a ni," a ti.
Volleyball Federation of India Vice President term hnihna chelh mek Dr Mala chuan, "Mizoram chhunga district tinah volleyball a nung thar hle a, thil lawmawm a nih angin nasa zawkin district tinah hmasawnna a thlen theih nan hma kan lak a pawimawh dawn hle a ni," a ti bawk.
General Secratary ni lai, Volleyball Federation of India Development Committee member C Lalrokhuma chu a nihna ngaiah a tling bawk.MVA 2022-2025 hruaitu tharte:
President : Dr Lalmalsawma Nghaka, Kulikawn
Senior Vice President : Lalmawizuala, Muanna Veng
Vice President : Donald Lalthanmawia Khawlhring, Kanan Veng
General Secretary : C Lalrokhuma, Electric Veng
Joint Secretary : RK Hmingthanga, Bungkawn
Joint Secretary : Singliana, Ramhlun North
Treausurer : H Vanlalngura, Tuikual North
Finance Secretary : David Zochhuanmawia, Electric Veng