Aizawl: Aizawl |huampui venga Aizawl North High School buidling thar hawnna leh HSLC pass lawmna Inrinni khan Chief Minister Zoramthanga’n a hawng.
Thuampui YMA hall-a inkhawm neihah khuallian, Chief Minister Zoramthanga hian thu sawiin, sorkarin zirna ngai pawimawhin tihchangtlun zel tum a nih thu a sawi a. Aizawl North High School building thar hawn chu a lawmpui thu sawiin, kumina board exam-ah result tha tak an nei chu fakawm a tih thu a sawi.
Chief minister hian thalaite chu zirna kawnga theihtawp an chhuah laiin an nun hloh loa inthunun tlat tura chahin, “Zu leh ruihhlo hian Siamtuin kan nih tur a duan ang ni pha loa min dahtu a ni,” a ti.
Khualzahawm, School Education Minister Lalchhandama Ralte pawhin thu sawiin, |huampui khawtlang chu zirna an ngaih pawimawh avanga hma an lak dan chu fakawm a tih thu a sawi a. Ram hmasawnna atan education chu lungthu pawimawh tak a nih avangin zirna lama theihtawpa sorkarin hma a lak zel tur thu a sawi a. Zirna peng hrang hranga hmasawnna bakah hnam ziarang hriatchianna leh mahni nihna a nghet tlat a awm a pawimawh tih sawiin, chumi atan chuan elementary level-a subject thar, ‘Zonun’ chu dah a nih thu a sawi bawk.
Aizawl North High School building hi Rs. 11,23,353, senga sak a ni. Assam type chhawng khat a ni a. A sakna tur hian fund raising committee dinin local council, NGO leh khawtlang mipui atanga vehbur khawn a ni.