South Africa-a East London khawpuiah nightclub pakhatah ruang 20 vel zet chhar a ni tih thuneituten an sawi.
Ruangte hi Pathianni zing hma taka Enyobeni Tavern-a chhar niin mi eng emaw zat hliam an awm bawk nia sawi a ni.
“Hetiang thil a thlen theih dan hi kan chhui zui mek a, tun dinhmunah chuan thil sawi thui vak a la rem lo,” tiin police thupuangtu chuan Newzroom Africa television channel a hrilh.
“Tuna kan thlen chinah chuan engnge ni thei hriat leh sawi mai a la harsa,” tiin Brigadier Tembinkosi Kinana chuan a sawi.
Eastern Cape province-a thil thlenna hmunah hian emergency service mi leh sa tam tak an awm mek a ni.
Thi chhungte pawhin ruang hi an la hmu thei rih lo tih sawi a ni a, tual chhung mite pawhin a hmun chu khar rih an ngen bawk.
Eastern Cape Police Commissioner Nomthetheleli Lilian Mene chuan tavern-ah hian ‘inchil buaina a thleng a ni thei’ tih SABC News hnenah a sawi.
SABC hian mi pali hliam tuar chu damdawi inah dah an ni bawk tih a sawi.
Brigadier Kinana chuan thuthar lakhawmtute hnenah thi tam zawk hi thalai la naupang tak tak, kum 18 leh 20 inkar vel an nih thu a sawi.
Thil thleng hmutute chuan ruangte hi chhuatin a chimpui ni awm takin an inbawh darhsarh nuaih niin Daily Dispatch chanchinbu hnenah an sawi.
Eastern Cape-a health department thupuangtu chuan ruangte hi khawpui chhunga ruang dahna in hrang hrangah dah an ni tih News24 a hrilh.
Siyanda Manana chuan, “A rang thei ang berin ruangte hi endik kan tum a, an thih chhan ni thei pawh hriat theih beisei a ni,” a ti.
South Africa-a Minister of Police Bheki Cele pawhin Eastern Cape hi pan nghalin mi thiam rualte pawh chhui zui hna thawhnaa pui turin a tirh belh nghal niin tih province premier Oscar Mabuyane chuan a sawi.
“Kan awih thei lo, thalai damlohna pawh nei lo, an chhungte nena tha taka chenghote chu thlasik chawlh an hmang chu hetiang hian an tawp ta mai si a ni,” a ti.