Silchar-a tui lian vanga tui thianghlim in tur mamawh mi tam tak tana YMA branch hrang hrang leh mi mal leh pawl thahnemngaiten an thawhkhawm tui thianghlim eng emaw zat chu CYMA ruahmannain motor 11 hmangin nimin khan Silchar panpui a ni.
Inrinni zana Central YMA Executive Committee thukhawm chuan Silchar-a tui thianghlim thawn thlak a rel a, hemi bawhzui hian tui thianghlim in tur thawh thei branch YMA, pawl leh mi malte sawmna a siam nghal a; Branch YMA 31-in tui case 696 an thawh a ni.
Tui thianghlim thawn thlak a nih theih nana hma latu, Central YMA-in tui case 100 thawhin, SBI Officers Association of Mizoram-ten case 200 an rawn thawh bawk a. Branch YMA thenkhat pawisa fai thawhte hmangin case 170 an lei belh bawk a, mi mal thawhte nen case 1,183 tlingin, litre 15,000 a ni.
Tui thianghlim litre 15,000 hi lirthei 11 hmangin nimin chawhnu dar 1:30 khan City Park atangin Silchar panpui a ni a, heng lirtheite hi Central YMA President R. Lalngheta’n a vai liam.
Central YMA-in Silchar mipuite tana an tui thianghlim an ken thlak hi Silchar Branch YMA hruaitute bakah Kolasib Sub Hqrs. YMA hruaitute leh Kolasib DC nena tangkawpin Cachar DC hnena hlan dan tur buatsaih a ni a, Assam sorkar pawhin ministry level-ah official-te nena lo dawnsawn an tum nia thudawn a ni.