- Ruata
Union Minister for Road Transport & Highways, Nitin Gadkari chuan India rama passenger phur lirthei te him leh himloh enchhina tur Bharat NCAP (New Car Assessment Program) hman a nih theih nan a draft notification chu a pawm a, hei hi nakum, kum 2023 April Ni 1 atanga hman tan tur a ni.
Bharat NCAP hi kum 2016 khan puanzar a lo ni tawh a, tunah hian kan ram chuan a hlawhtlinna hmel a hmu dawn ta a. Hemi hnuaiah hian lirthei mi 8 phur thei leh a hnuailam, ton 3 leh a chanve aia rit lo enfiah a ni dawn a. Hei hian chetsual nikhuain a chhunga chuang mihringte tan lirthei a him em tih a enfiah ber dawn a, hei hi lirthei him leh him loh enfiahna video kan hmuh tam tak ang hi a ni dawn tho a, hetihrual hian India ram dan mil leh India rama lirthei khalhdan phung milin he program hi duan a ni thung a ni.
Bharap NCAP hnuaia enfiah lirtheite chu a himdan azirin ‘star’ an pe zel ang a. A him poh leh ‘star’ a hmu hnem dawn tihna a ni a. Hei hi lirthei leitute tana thil tha leh hlu tak tur a ni a, sorkar hmalakna hi ram mipuite himna atan chuan thil tha tak a tih loh theih lo a. Lirthei chesual leh thil hrang hrang avanga thihna pawh nasa takin he program hian a tihhniam beisei a ni.
Union Trasport Minister Nitin Gadkari chuan tweeter kaltlangin he Bharat NCAP chungchang hi a sawi nual a. Minister chuan he program hi lirthei leitute hmakhaw ngai leh anmahni tan bera siam a nih thu a sawi a. Lirthei leitute chuan Bharat NCAP hnuaia ‘star’ hmu tam nge nge chu an lei duh zawk zel a rin thu a sawi a, hei hian nasa takin lirthei siamtuteah pawh inelna thianghlim a siam dawn niin a sawi bawk a ni. Nitin Gadkari chuan he thil hian ram mipuite himna mai bakah rampawna lirthei thawnchhuah lam thleng pawhin nghawng tha tak a neih a beisei thu a sawi a, thawnchhuah atana tlak lehzual lirthei siamchhuah kawngah nasa taka puitu tur niin a sawi a ni.
Union Transport Minister chuan Bharat NCAP hnuaiah hian khawvel huapa lirthei him leh himloh enfiahna mil leh ‘level’ thlapin India sorkarin a phut anga him lirthei a ni em tih chu enfiah a ni dawn tih a sawi a. Lirthei siamtute pawhin mahni ramchhungah ngei an lirtheite him leh him loh an enfiah thei dawn niin a sawi a, India sorkar programme pawimawh Aatmanirbhar tihhlawhtlinna tur pawimawh tak a ni tih a sawi bawk a, “Bharat NCAP hi khawvel huapa India ram automobile hub lian ber ni thei tura nasa taka puitu tur a ni,” a ti.
A hma khan Bharat NCAP chungchang hi Abhay Mannikar, Advisor, Automotive Research Association of India (ARAI), Union Ministry of Heavy Industries nena thawk dun chuan a lo tarlang tawh bawk a. Bharat NCAP a hlawhtlinna atana leh pawm thuai a nih theih nan document pawimawh te pawh an peih thawkhat thu a lo sawi tawh a, tun hi Bharat NCAP pawm leh hmanna tura hun pawimawh tak niin a lo sawi tawh bawk a ni.
Bharat NCAP hi petrol leh diesel hmang lirtheiah chauh hman a ni dawn lo a. Tunhnaia lar chho mek leh kan sik leh sa leh leilung chhe zel avanga kan mamawh leh hman tam chhoh tur nia lang electric hmang lirtheite pawh hemi hnuaiah hian enfiah an ni vek dawn a. Hmundanga lirthei him leh him loh enna NCAP hrang hrang chuan lirtheia chuang bik himna an enfiah dan hi puitling leh naupangah a hrangin an en thin a. Bharat NCAP hi chuan puitling leh naupang tana a him leh him loh chu rating khat hnuaiah a pe dawn thung a ni.
India ram sorkar chuan kawngpuia chetsualna leh thihna thleng thin chu zaa 50 in kum 2030 tawp lamah chuan tihhniam a tum a, hemi atan hian Bharat NCAP hi hmalakna tha tak a ni a. India ram hian khawvel huapin lirthei chetsualna record hi a nei chhe em em a, kum 2020 khan National Crime Records Bureau (NCRB) in an tarlan danin kawngpuia lirthei chesual avangin mi 1,20,000 an thi a ni.
Bharat NCAP hi India rama cheng mipuite tan chuan sorkar hmalakna lawmawm tak a ni a. Hemi atana inbuatsaih pawh hi India rama lirthei siamtute chuan an han nei chho mup mup ang a, tuna kan lirthei hmuh pawh sorkar khuahkhirhna mila him tak a nih tawh laiin company hrang hrang te chuan an lirtheite Bharat NCAP hnuaiah ‘star’ tam thei ang ber hmuh tir an han tum ang a, nakum April thla atang chuan lirthei him lehzual kan hmu dawn ti ila kan sawisual tam awm lo e.