Mizoram sorkar hnathawkte inzawmkhawm, Federation of Mizoram Govt. Employees & Workers (FMGEW) huaihawtin sorkar hnathawkten dearness allowance (DA) zaa 34 pek phutin nimin atang khan badge dum an bel tan a, tun kar chhung zawng an bel dawn.
FMGEW chuan sorkar laipui hnuaia thawkten DA an lak zat, zaa 34 an lak ve theih nan Mizoram sorkarah vawi eng emaw zat dilna an lo thlen tawh a, hei hian awmzia a neih loh avangin June 21, 2022-a FMGEW Executive Committee thukhawm chuan June 27 atanga July 1 thleng sorkar kar nan badge dum bel an rel a, nimin atang khan sorkar hnathawkte chuan an bel tan a ni.
The Zozam Times-in Aizawl khawpui chhunga sorkar pisa hrang hrang a fan kualnaah sorkar hnathawkten badge dum an bel tha hle a, FMGEW hruaitute chuan sorkar kar nana ruahmanna an siam hian zawm a hlawh hle niin an sawi.
DA zaa 34 pe tura sorkar kar nana badge dum an bel hian awmzia a nei lo a nih chuan hmalak chhunzawm zel dan tur chu rel thar leh atan an dah tih FMGEW hruaitute chuan The Zozam Times an hrilh.