Ruihhlo hman sual leh tawlh ruk dona ni (International day against drug abuse and illicit trafficking) pu- alin nimin khan Govt. Champhai college-ah ruihhlo leh a kaihhnawih chungchang inzirtirna hun hman a ni.
District level nasha mukt bharat abhiyaan (NMBA) leh district level narco coordination centre (NCORD) committee, tangkawpte buatsaih ruihhlo leh a kaihhnawih chungchang zirhona hun hi Champhai Bawrhsap James Lalrinchhana'n a hmanpui a. Ruihhlo ngaihnain khawvel pumpui a tihbuai thu sawiin, ruihhlo hluar zel tur do kawngah lungrual taka tanho a tul tuh a sawi.
Zirna chu ruihhlo leh a kaihhnawih dangte beihlet leh do kawnga hmanraw pawimawh berte zinga mi a nih thu Champhai Bawrhsap chuan sawiin, zirlaite chu ruihhlo laka inthiarfihlim tur leh, tum bul mumal tak neia thil chik nachang hre turin a chah a. Zirlaibua chuang chauh ni lo, an vela awm te ngun taka chika ngaihven fo tur leh thiamna engemaw tal neihna atana hman tum turin a chah.
Champhai Bawrhsap chuan ngaihsan tur dik tak ngaihsan nachang hre tur leh ruihhlovin a tihbuai hmanloha hmasawnna tura ngaihtuahna seng tura chahin, "hlawhtling tura tumruhna, taimakna leh rinawmna in neih chuan ruihhlovin in nunah hmun a chang hman ngai dawn lo a ni", a ti bawk.
Ruihhlo leh a kaihhnawih chungchang inzirtirna hman zawhah Drug awareness rally neih chhunzawm niin, College zirlai ten Champhai college multipurpose hall atanga college main gate thlengin kawng an zawh a. Chawhnu lamah Champhai khawpui chhunga zirna in thenkhat - Vengsang HS, Govt. GM. HS, Govt. Roseland School, Govt. Vengthlang MS, PES Vengthlang, Govt. Champhai HS, Govt. Venglai MS, Govt R. Hranga HS, Govt. Kanan MS, Govt. Bethel MS leh Bethel HS ah te ruihhlo chungchang inzirtirna hun an hmang zui bawk a ni.