India rama coronavirus kai hmuh chhuah an pung leh hret hret zel a, darkar 24 liam ta chhungin mi 17,073 zetin an kai tih hmuh leh niin a hma nia hmuh chhuah aiin 45% zetin an tam zawk.
Hri kai hmuh tharte nen hian India rama Covid kai hi mi 4,34,07,046 an tling tawh a ni.
Darkar 24 liam ta chhung hian Covid-19 vangin mi 21-in nunna an chân leh hman bawk a. Hri leng avanga thi hi mi 5,25,020 an thi tawh a ni.
Hri kai enkawl lai pawh pung chhunzawm zelin mi 94,420 an tling leh tawh a. Darkar 24 liam ta chhungin enkawl dam (mi 15,208) aiin a kai hmuh thar an tam avangin enkawl lai hi mi 1,844-in an pung leh hman a ni.
Darkar 24 liam ta chhunga sample endik zinga 5.62% zet chuan hri an kai tih hmuh a ni a, chawlhkar khat liam ta chhunga endik zinga 3.39%-in an kai bawk tih union health ministry chuan a tar lang.
Hri kai hmuh tawh zinga mi 4,27,87,606 chu enkawl dam leh tawh an ni a, a kai hmuh tawh zawng zawng atanga chhutin 1.21%-in an thihpui a ni.
Ministry-in a chhinchhiah dan chuan invenna pek beihpui thlak kal mek zelah vaccine dose vaibelchhe 197.11 pek a ni tawh.