India rama rorelna court sang ber, Supreme Court-ah Maharashtra-a rorelna fawng chelhtu, Shiv Sena-a pawl hnih chu inkhingin Thawhtanni atang khan an chungthu hi rel tan a ni.
Tar lan tawh angin Sena MLA thahnem tak chu helin Assam-a Guwahati khawpuia khualbuk changkangah an inkulh mek a. An zinga thenkhat chu Maharashtra assembly-a deputy speaker chuan an MLA hnihna hnawlsak a tum a, hemi chungchang hi nihna hlihsak tumte hian court-ah hian an zualkopui ta a ni.
Thawhtannia MLA helte thu thlen ngaihtuahah hian court chuan July 11-a ngaihtuah chhunzawm leh turin thu a dah a ni.
Court sang ber hian Maharashtra sorkarin thutlukna lailawk siama assembly-a sorkarin rintawk a hlawh leh hlawh loh buk rih lo tura ti tura a tih tura a ngenna chu a hnawlsak.
Eknath Shinde-a kaihhruaina hnuaia MLA hel inkulh mekte chu deputy speaker-in an nihna hnawlsak a tum chungchang chu insawi fiaha chhanna pek hun siamsakin July 11-ah an thu hi ngaihtuah chhunzawm leh turin a ti.
Court sang ber hian deputy speaker chu MLA-te laka dan lek turin thuneihna a neih leh neih loh chu court thu a nih thu a hriattir a. Hel lam MLA-te hian Deputy Speaker Narahari Zirwal-a laka rintawk lohna an neih chu buk a nih hma chuan anmahni nihna hnawlsak turin dan angin theihna a neih lo niin an sawi a ni.
Party pakhata MLA-te inkhinnaah hian Justice Surya Kant chuan Maharashtra sorkarin rintawk a hlawh leh hlawk loh buk rih lo tura ti tura sorkar lamin an ngenna chu a hnawl a. Hel lam zawkin buk tura an duh a nih chuan court-ah bawk thlen leh turin a ti thung.
Maharashtra sorkar chu tuna Sena MLA hel mekte nunna, an zahawmna leh an thil neih bakah an chhungte zawng zawng himna pe turin court hian a ti bawk.
Hel lamte hian deputy speaker-in an nihna hlihsak a tum hnuah court sang berah hian petition pahnih an thehlut nghal a. Annihna hlihsak tumna bakah hian legislative party leader atana Ajay Chaudhary ruat a ni chu an duh lo a ni.Chief minister-in helho chanpual siksawi
Chief Minister Uddhav Thackeray chuan Guwahati-a inkulh hrang mek MLA zinga minister telte chu an hna chanpual siksawisakin mi dang kutah a dah ta a. Sorkar chu a kal dan pangngai renga a kal a ngaih avangin minister awm lo chu a buaithlak a, a bikin assembly fur thutkhawm tan a hun tawh bawk si avangin thutchilhtu minister a tul thu Chief Minister’s Office chuan a sawi.
Shinde-a chan thin, urban development department & public works (MSRDC) chu Industries Minister Subhash Desai-a hnenah pek a ni a. Higher & technical education portfolio pawh Uday Samant-a chan thin niin Environment Minister Aaditya Thackeray-a’n a chang dawn a; Gulabrao Patil-a chan thin, water supply & sanitation chu Transport Minister Anil Parab kutah dah a ni a; Dada Bhuse chanpual, agriculture department leh Sandipan Bhumare-a chan, employment guarantee scheme chu Shankarrao Gadakh hnenah pek a ni a, ani hi independent MLA niin Sena thlawptu a ni.
Cabinet minister-te bakah hian minister of state pali - Shambhuraj Desai, Rajendra Patil, Abdul Sattar leh Omprakash Kadu te hna chanpual pawh mi dang kutah dah a ni.
Tar lan tawh angin Sena MLA hel mek zingah hian cabinet minister panga leh minister of state pali an tel.
Higher & Technical Education Minister Samant-a hian Shinde kaihhruai hel lam hi Pathianni tlai khan zawmin MLA 39 zet an ni ta a. Surat atangin Guwahati hi a secretary leh Thane-a Sena worker pakhat nen an thleng a ni.