Japan sorkar chuan an khawpui, Tokyo leh a chhehvela chengte chu an rama khaw lum lutuk avanga electric an hman nasat a la ngaih dawn avangin Thawhtanni khan an electric hmante off then turin an ti.
Ministry of Economy, Trade & Industry chuan Thawhtanni chawhnu khan an power dinhmun chu tha lo hle turin an sawi lawk a ni.
Mipuite chu boruak thununna (air conditioner) hmang chung siin hmun danga tul lova an hman thinte switch off turin an ngen a ni.
Chawlhkar eng emaw zat khua a lum tawh avangin power lamah hian an talbuai an hlau a ni.
Kartawpah khan Tokyo lailiah chuan khaw lum lam hi 35°C a ni a, Tokyo hmarthlanga Isesaki-ah chuan 40.2°C zet niin Japan rama June thlaa khua a lum ber tum a ni.
Japan-ah hian June-ah nipui a intan thin a; mahse, a dan pangngaiah chuan 30°C hnuai a ni thin.
Pathiannia ministry-in thu an chhuahah Thawhtanni chawhnuah chuan Tokyo leh a chhehvel prefecture pariata electric an siam chhuah zat chu 3.7% vela a tlakhniam tur thu an sawi lawk a. Power supply an pek dan thin pangngai chu 3% vela an phak loh phah an ring.
Sorkar hian mipuite chu an ram sanaa chawhnu dar 3:00 atangin darkar thum chhung tal an hman loh thilte chu off turin an ngen a ni.
Electric pe chhuaktute chuan tam zawk siam turin tan an la reng tho tih ministry chuan a sawi a; mahse, khua a lum zel avangin thil sawi lawk a har a, inrenchem phawt chu a tul niin an sawi.
“Mamawhna a sana pek chhuah a buai si chuan dah khawl sa hian mamawh thin ang chu 3%-in a phak lo sa si a ni,” an ti.
Japan hma hian Australian thuneitute chuan an khawpui lian ber, Sydney awmna, in New South Wales state-a chengte chu power indaih lohna avangin an light off turin an lo ngen tawh bawk.
Hetih lai hian Japanese public broadcaster NHK chuan khaw lum lutuk avang hian Pathianni chawhnu khan Tokyo khawpuiah mi 46 lai chu damdawi ina dah ngaiin an awm niin a tar lang.
Kawagoe khawpuiah putar kum 94 mi chu khaw lum vang ni ngeia hriatin a thi bawk.