BJP Mizoram Pradesh President Vanlalhmuaka chuan Mizoram sorkar chu hmasawnna hna thawk mek, kawngpui laihah a thawhpui tha tawk loah a puh.
Thawhtannia an pisa-a party chhung inkhawm neihah thu sawiin Vanlalhmuaka hian National Highway hi state sorkarin kum 20 chuang enkawl tawh mah se, an enkawl hleih theih loh avangin central sorkarin Mizoramin kawng tha a neih theihna'n tia sorkar laipuiin kawng laih hna a thawk mek laiin, Mizoram sorkar hian a thawhpui tha tawk lo hle tih a sawi.
“Tuna a lan dan chuan state sorkar-a tu tuten emaw hlawkna beisei leh kawngin a paltlangna turah ram in neih siaknaah kan tlan mek a, chu chuan kan ram hmasawnna hi a dal nasa em em a ni,” Vanlalhmuaka'n a ti.
Health Care scheme chungchang sawiin BJP State President hian, Mizoram sorkarin health care scheme-ah cheng vaibelchhe 76 vel lai mipui sum a batsak sutkianna turin Zoramthanga kaihhruai MNF sorkar chuan Rs. vaibelchhe 1,000 puk a tum thu tih a sawi a. “Rs. vaibelchhe 76 vel bain, Rs. vaibelchhe 1,000 han puk chu, chhut thiam chuan chhut mai tur a ni,” a ti bawk.
BJP State Spokesperson K Laldinthara pawhin thu sawiin, “Mizoram sorkar hian anmahni khawih phak loh central project-te a hlawhtlinna turin hna an thawk tha duh lo a, hei hi Ministry Of Road Transport & Highways-in Mizoram kawng an sial mek chungchangah pawh a lang chiang hle a,” tia sawiin, compensation chungchangah nasa takin buaina an siam avangin National Highway siam mekah harsatna a thlen tih a sawi a ni.