Manchester United chhuahsan tur England midfielder Jesse Lingard chu West Ham United in London Stadium a kir leh turin inbiakna an neihpui.
July 1 atangin kum 29 mi Lingard hi free agent a ni dawn a, Old Trafford a chhuahsan tur hi a chiang lo.
Kum 2020-2021 season chawhnu lam khan loan in Hammers tan hian a khel a, Premier League-ah match 16 khelin goal 9 a khung bakah midang khung tur vawi nga a siamsak a. Loan a hun a hman chhungin fak a hlawh hle.
Kumin January khan Hammers hian hawh nawn leh duh mahse United lamin chhuah an phal lova, an squad a awm turin an duh.
Manchester United chherchhuah England midfielder hian United tan vawi 232 inkhel tawhin goal 35 a khung tawh a. England tan vawi 32 inkhelin goal 6 a khung tawh bawk.Europe beisei Hammers an che chak
West Ham United hian tunhnaiah a lian parukte an hnaih sawt hle a, season tharah top four a tel tum turin an inbuatsaih mek.
An goalkeeper Alphonse Areola chu Paris St-Germain atangin a nghet a lakluh an tum a, season liamta a loan a an hawh French goalkeeper hi Pound maktaduai 10.5 velin lei ngheh an tum.
Kum 29 mi hi first-choice Lucasz Fabianski nena khelhna inchuh tura ngaih an ni a, kum 37 mi ni tawh Fabianski hian kum khat contract a ziah belh ve bawk a. Areola hian rinrawl ni turin a thlak zui tura ngaih a ni.
Hammers hian tun season-ah Europa Conference League play-off an khel dawn a, August 1 hian UEFA in tie draw a neih hunah an khingpui tur an hria ang.