AIZAWL: YMA, Kulikawn branch leh Kulikawn VDP te chu Pathianni kalta khan Kulikawn veng chhuahlam (Aizawl by-pass road/world bank road) Chekbawk-ah an duty-a rakzu, sap zu leh beer bakah Ganja leh damdawi ruih theih chi thahnem tak an man.
Kulikawn veng huam chhung, Chekbawk leh World bank road leh a chhehvelah tunhnaiah zu leh ruihhlo dang a hluar thar hle avanga duty an nih thu Kulikawn YMA chuan an sawi a. Pathianni kalta-a zu leh ruihtheih thil dang an man te leh a neitu nia puh mi 20 chuang te chu Kulikawn Police station-a duty te kutah an hlan tih an sawi.
Kulikawn YMA chuan a tul angin an duty zel dawn tih sawiin, Kulikawn veng chhungah zu leh ruih theih thil dang te ti lo tur leh la lut lo turin mitin an ngen a. Hetiang mi an man a nih chuan Police emaw Excise & Narcotics thuneitute hnenah emaw an hlan zel dawn tih an sawi bawk.