Aizawl: Mizoram Pradesh Youth Congress Committee (MPYCC) chuan CTI Sesawngah Martarte Lungphun kum 25-na, Silver Jubilee an lawm a. Congress Legislature Party leader, party treasurer ni bawk, Zodintluanga Ralte-in a hmanpui.
Thu sawiin Zodintluanga Ralte chuan, “Mizoramah rambuai tah leh hathialnaah kan rum a, Congress party zarah remna leh muanna kan nei ta a, kan sawi duhte sawi ngam kan nih takah chuan ram tana nunna chân tate ngaihthah an ni kha MPYCC rilru a na em em a. MNF sorkar, a ti tur bera kan ngaihin an sorkar lai pawha an ngaihsak loh avangin, kan tih turah ngaiin kan ti ta a ni,” a ti.
“Aizawl tlak lamah mipui atanga nawrna nasa tak karah thinlung tak taka tih ni lo, martarte thlan an siam ve leh hnuhnawh a ni,” tiin, Zodintluanga Ralte chuan MNF-ten martarte an ngaihthah rei thu a sawi.
Martarte Lungphun kum 25-na lawmna inkhawmah hian CTI Sesawnga MPYCC-ten Martarte Lungphun an din tirh tuma president, John Rotluangliana leh MPYCC president ni mek, Dr. Lalmalsawma Nghaka ten thu an sawi bawk.
MPYCC president leh president lo ni tawhte chuan martarte hriatrengna leh zahna lantir nan lungphunah pangpar an dah a ni.
Congress Thalaiin an tar lan danin, June 27, 1997 khan a hun laia chief minister, Lal Thanhawla’n Martarte Lungphun hi a hawng a. Mizoram rambuai, kum 1966-86 chhunga Mizo fa nunna chân tate tana lungphun siam hmasak ber a ni a, lungphunah hian hming 1,168 a chuang mek a, kum 2014 khan Sergeant Lalduha ruhro phum a lo ni tawh bawk.