ZPM Legislature Party Secretary Dr Vanlalthlana chuan sorkar laipui atanga Mizoram sorkarin sum a dawnte budget document-ah a awmna turah dah loh a awm tih sawiin, hemi chungchang sawifiah turin sorkar a phut tih a sawi.
Nimin khan Aizawl Press Club-ah thu thar thehdarhtute kawmin Dr Vanlalthlana hian RTI-a zawhna chhanna chi hrang hrang an dawn atangin sum tak tak, Mizoram budget document-a tar lan loh an hmu chhuak tih a sawi a. “Sum pawh lo dawng mah se la, a account dahna a danglam hian hman theih dante a danglam theih avangin kan ngaih a tha lo hle a ni,” a ti.
Dr Vanlalthlana hian budget document-a sorkar sum dawn tar lan loh zingah 15th Finance Commission atanga kum 2020-21-a Urban Local Body (ULB) leh Rural Local Body (RLB) atan sorkarin Rs 13,800 lakh a dawn laiin, Annual Financial Statement 2022-23-ah Rs 4,500 lakh chauh tar lan a nih thu leh, Special Assistance for Capital Expenditure tana state sorkarin Rs 49,999 lakh a dawn laia Annual Financial Statement 2022-23-ah Rs 29,999 lakh chauh tar lan a nih thu a sawi.
Heng Urban Local Body (ULB) leh Rural Local Body (RLB) atana sum dawn zinga Rs 9,300 lakh leh Special Assistance for Capital Expenditure atana sorkarin sum a dawn zinga Rs 20,000 lakh budget document-a ziah lan lohte chu an awmna leh an hman dan sorkarin sawi tura a phut thu a sawi.
Budget document-a dik lo tar lan tumna leh budget buaipuitute tihhminghliau tumna ai mahin, state sorkarin sum a dawnna account tihdanglam a ni hi an ngaih ti tha lotu a nih thu leh, Rs 29,000 lakh lai telh loh emaw, account danga awm thei tur hi hman lohna turah an hman mai an hlauh avanga mipui hriata puangzar an ni tih a sawi.“Chief Minister leh Finance Minister ni bawk, a minister leh MLA te’n sum enkawl thiam avanga an fak rawn Pu Zoramthanga hian a sawi fiah kan phut a ni,” Dr Vanlalthlana’n a ti.
Zawhna chhangin Dr Vanlalthlana hian, budget document-a lang lo Rs 29,000 lakh te hi a bo a rin loh thu a sawi a. "A bo chu a bo lo ang a. Head zawna a awm tak lohah hmun dangah an pawt lut em ni tih hi kan ngaihtuahna a ni a. Account dangah a lut a nih chuan thil dangah hman a ni tihna a ni ang a. Cheng nuai tel teh meuh account nilo puia a awm hi state pakhat budget ve angrenga a awm hi a zia lo em a ni," a ti a ni.