Vawk vulhtute dinhmun thlir chunga hri leng laka hmalak a tul
African Swine Fever (ASF) leng a la reh fel hlei thei lo a, he vawk natna leng thawh hnihnaah ringawt pawh hian vawk 6,468 an thi tling leh der tawh. Heti tak maia vawk hri leng kan tuar hi a pawi hle a, sorkar hian zangnadawmna hi a ngaihtuah ran a tul hle tawh a ni.
Vawk vulhtu tam tak an mangang a, dinchhuah ngaihna awm tawh lo khawpa tuar nasa pawh an awm. Heng mite dinhmun hi ngaihtuah ran a tul hle tawh a, sorkar hian central lam puihna ngawt nghak lova amaha puih dan a zawn a va hun ve tawh em.
Vawk pul hri leng nawn leh hi Champhai district atanga intanin February 4 atang khan ASF hri kai hi hmuchhuah leh tan a ni a, thawhtanni thleng khan Champhai district-ah hian vawk 3,114 a thi tawh a, fimkhur thu-ah vawk 3,498 suat an ni tawh a; vawk thi leh fimkhur thua suat tawh zawng zawng belhkhawm zat chu 6,612 a tling tawh a ni. A rapthlak tak zet.
Champhai district tih loha tuar nasa Mamit district chhungah pawh vawk pul hri leng chuan ziaawm lam pan lovin vawk thi a pung zel a, kumin chhungin ASF vangin vawk 1,389 a thi tawh bawk.
Sorkar hian vawk vulhtute dinhmun hi ngaihtuah rang se la, vawksa heh hnam kan nih hrerengin thlamuanga kan awm theihna turin nasa zawkin thawktute pawhin a tih reh dan kawng zawng zel mawlh rawh se.