India ramah darkar 24 liam ta chhungin coronavirus kai mi 11,793 hmuh chhuah leh hman niin mi 4,34,18,839-in an kai ta a, enkawl lai pung zelin mi 96,700 an tling leh tawh tih union health ministry chuan a tar lang.
Darkar 24 liam ta chhung hian mi 27-in Covid hi thihpui leh hmanin mi 5,25,047 an thi tawh bawk.
Tun hnaiah a kai hmuh an pun leh avangin enkawl lai pawh pung hret hret zelin a kai hmuh tawh zawng zawng atanga chhutin 0.22% chu enkawl mek an la ni.
Enkawl dam tawh zawng zawng erawh 98.57% an ni tawh niin health ministry chuan a tar lang bawk.
Darkar 24 liam ta chhung hian enkawl dam aia a kai hmuh an tam zawk avangin enkawl lai hi mi 2,280-in an pung leh hman a ni.
Darkar 24 liam ta chhung hian sample endik zinga 2.49% chuan Covid-19 hi an kai tih hmuh chhuah a ni a, chawlhkar khat liam ta chhunga endik zinga 3.36%-in an kai bawk.
Hri kai hmuh tawh zinga enkawl dam tawh zawng zawng hi mi 4,27,97,092 an tling tawh a, 1.21%-in an thihpui tawh thung.
Invenna pek beihpui thlak kalpui mek zel niin vaccine dose vaibelchhe 197.31 pek a ni tawh tih ministry chuan a tar lang bawk.
Darkar 24 liam ta chhunga hri leng avanga thi mi 27 zinga mi 13 chu Kerala-a mite niin Maharashtra-ah mi panga, Delhi leh Punjab-ah mi pahnih ve ve leh Madhya Pradesh, Mizoram leh Uttarakhand-ah te mi pakhat theuh thi an awm bawk.