India rama police-te chuan thil thleng a dik leh dik loh enfiahtu (fact-checking website) dintu pakhat zawk, Prime Minister Narendra Modi-a sorkar sawisel fo thin an man.
AltNews dintu, Mohammed Zubair-a hi Twitter-a Hindu rin dan sawichhiaa puh vanga man a ni tih chanchinbu intelkhawm pawl chuan an sawi.
Eptu party hruaitute leh chanchinbumi tam tak chuan man a ni hi an sawisel nasa hle.
Hindu-nationalist sorkarin anmahni huat zawng sawi apiang hmehmih tuma hma a lakna niin an sawi a ni.
Zubair-a hian tun hnai khan BJP hruaitu pakhatin TV-a thil sawihonaa Prophet Muhammad-a a sawi bawrhbang chungchang a tar lang a. A thu tar chhuah hi nasa taka thehdarh niin Muslim ramte chuan India ram an hmuh dik loh phah nasa hle.
Hetiang a nih hnuah hian Zubair-a’n tun hma lama Twitter-a thu a lo tar lan thinte chu hai chhuakin an sakhaw rin dan a tihmelhem niin an puh zui ta a ni.
Zubair-a hi Thawhtanni khan man a ni ta a. An man chhan ber hi a Twitter account-a kum 2018 daih tawha thu tar lan pakhat, Hindu zawng pathian, Hanuman-a hmingchawia khualbuk hming phuah chungchang a sawi zui (comment) vang a ni tih Delhi police hotute chuan an sawi tih ANI news agency chuan a tar lang.
Police hian Zubair-a thil tar lan avang hian Twitter-a amah zuitute zingah inhnialna leh tawngkam chhe tak taka inbeihna a thlen zui phah niin an sawi.
Zubair-a hi Thawhtanni zan khan magistrate hnenah hruai niin ni khat police-in an kawl phalsak a ni a. Hemi hnuah hian a dan hre mi a hmu thei dawn a ni.
Chanchinbumi tam tak chuan rang taka chhuah leh an phut a. “Zubair-a hian thuthar dik lote a dik a puang thin a, thu dik lo a bei mai thin a, chuti chung chuan man a ni,” tiin Muslim chanchinbumi, Rana Ayyub chuan a sawi a. India chu sorkar pawisawi manna hmun niin a sawi bawk.