Play In tournament khelh inchuhna boruak a sang zel a, inkhel pawimawh a tam chho telh telh. Thawhlehni tlai khan Tuikual South leh Chanmari Vikings te an inkhel a, an dinhmun nghawng thui thei tur inkhelah 74-53 in Tuikual South BC an chak.
Mizoram Super League 7 inkhelah hian Tuikual South chakna chu an chah chhuah Darrell Bowie a ni leh a, point 28 leh rebound 16 a la a, assist vawi 6 nei bawkin hmahruaitu tha a ni.
Lalnunpuia leh Lalfakzuala ten point 17 leh 10 an thawh a, Lalfakmawia leh F. Zodinthara ten point 7 leh 6 thawhin rebound vawi sarih leh vawi nga an nei.
Chanmari Vikings tan Raymond Edward Miller Jr. chuan point 11 leh rebound 10 a la a. Michael F Lalawmpuia leh Lalruatkima ten point 10 ve ve an score a, anni pathum hi team tana point score hnem ber an ni.
Hnehna an chan avangin Tuikual South hian point 13 an hmu a, match 9 khelin khelh khat an la nei.
A sang pali in Play In an khelh dawn avangin match hnih la hmabak Chanmari Vikings tan beisei tur a la awm a, Ningani zanah Mission Veng Hotshots an khel anga, Inrinni zanah Khatla TBL an hmachhawn leh ang.