Jordan-a Red Sea lawngchawlhna hmun pakhat, Aqaba-a mihring tana tha lo boruak chi khat, chlorine gas put avangin mi 13 an thi a, mi 260 chuangin hliam an tuar bawk niin sorkar chanchinbuin a tar lang.
Thuneitute chuan bawlhlo (chemical) dahna container lian chu a khaina, crane fel lo avangin a tla a, a put ta niin an sawi.
Chhiatna hi an ram sanaa Thawhtanni tlai dar 3:15 (India-a tlai dar 5:45)-a thleng niin CCTV atanga a lan dan chuan container hi boruaka khai kân a ni a, chu chu lawng chungah tlain a puak zui ta a ni.
A bulhnaiah pawh boruak eng (bright yellow gas) a inphuh chhuak nasa hle a, mihring lo awm hnaite chu himna zawngin an tlanchhe nasa hle tih a lang.
Sorkar chanchinbu chuan Thawhtanni zan khan hliam tuar zinga mi 123 chu bawlhlovin a kan avangin damdawi ina enkawl an ni tih an tar lang a. Thenkhat chu an dinhmun pawh a tha vak lo tih an sawi.
Chlorine hi industry leh in chhunga thil tihfaina atana hman chi bawlhlo a ni a. Boruak lum dan pangngai (normal temperature) leh pressure-ah chuan a rawng eng a ni a. Hmun danga thiar tur hian nasa taka nem mukin dah daih thin a ni.
Thawk luh emaw, lem emaw, mihring vun a tawh emaw chuan mihring taksaa tui nen inpawlhin acid a insiam a, mihring taksaa cell a tichhe thin a. Chlorine tam tak hip luh phei chuan chuapah tui a titling a, nunna atana hlauhawm tak a ni thei.
Civil Defence Department chuan specialist team tirin boruak put leh a tihfai lam an buaipui.
Prime Minister Bisher al-Khasawneh pawhin Aqaba hi panin damdawi inah hliam tuarte a kan hlawm.
Interior Minister Mazen Faraya chu he thil thleng uluk taka chhui tur leh lawngchawlhnaa thawktute himna pawh ngaihtuahsak turin a ti a. Hetiang mihring tana hlauhawm ang chia dawnsawn leh thiar danah pawh ngaihtuah thar hmang turin a ti.