Indopui II-na laia Nazi concentration camp-a vengtu (guard) hna thawk thin, Josef S chu kum 101 mi zet ni tawh mah se Berlin bul, Sachsenhausen-a lung in tang sang chuang tihhlumnaa a inhnamhnawih ve avangin kum nga lung in tang tura hrem a ni.
German court-in Nazi mite zinga hremna a pek upa ber hian SS guard a ni thin anga an puhna chu nasa takin a pha.
Mi 3,518 zet thahnaah a pui nia puhnaah thiam loh chantir a ni.
Indonaa an man, Soviet mi eng emaw zat kah hlum leh Zyklon B gas hmanga mi dang tam tak tihhlumnaa inhnamhnawiha puhin thiam loh chantir a ni.
A lamtang dan hre mite chuan an puhna hi nasa takin an pha a, lung in tang tura hremna pawh court sang zawkah ngaihtuah leh turin thlen an tum.
Indopui II-na lai khan Sachsenhausen-ah hian tam, thawhrim lutuk, damdawi lam enchhinna leh SS sipaiten an thah avangin mi tam tak an thi a. Mi 2,00,000 zet tang an awm a, hengte hi politics thil avanga mante bakah Juda, Roma leh Sinti (Gypsy) an ni.
“He hmuna ka thut ve chhan hi ka hre lo, engmah tih ka nei ve lo tak zet a ni,” tiin Josef S hian Brandenburg an der Havel-a hremna an pek puan a nih hma lawkin a sawi.
Pha nasa hle mah se Judge Udo Lechtermann chuan court-in concentration camp-ah hian kum 1942 atangin kum thum vel a thawk tih a sawi a. “I nihna hmangin mi suatna hi i pui nasa a ni,” a ti.
Nazi camp-a guard-te chungthu rel hi kum 2011 atang chauh khan neih tan a ni a, SS guard thin, John Demjanjuk chu hrem hmasak ber a ni a. Tun thlengin insuatnaa inhnamhnawihte hi zawn zel phah a ni.
Kum li hnuah ‘bookkeeper of Auschwitz’ an tih thin, Oskar Gröning chu lung in tang tura hrem leh a ni a. Kum 97 mi, concentration camp secretary thin chu Germany hmar lama court-ah a chungthu rel mek a ni bawk.
Josef S hi lehkha pawimawh hrang hrangah SS guard niin a pian ni leh thla pawh hmuh theih a ni a, amah erawh chuan camp-ah hian thawk lovin lo neitu mai a nih thu a sawi.
An hremna hi Germany-a court sang berah khin let an tum avangin hremna hi tunah a tuar tan nghal mai dawn lo a ni.