Aizawl : National Students’ Union of India, Mizoramin NABARD sum puk hmanga sak, West Lungdara Govt. Middle School building chu luah tlak a nih loh avanga an luah loh avangin bialtu MLA-in zirtirtute sawnah a vau niin an sawi.
NSUI, Mizoram chuan Dampa bialtu MLA, Lalrintluanga Sailo-in West Lungdar-a Govt. Middle school headmaster leh zirtirtu senior pakhat chu phone hmangin a vau niin an sawi a, he thil thleng hi an dem thu sawiin, “Mi dang dikna rahbehnaah kan ngai,” an ti.
West Lungdar-a Govt. Middle school building chu NABARB sum puk Rs. nuai 29 hmanga sak a nih thu leh office leh choka sak tel a nih loh thu NSUI chuan an sawi a. Inthiarna a tha lo va, school building leh room a zim hle bawk nia sawiin, school building chu luah tlak a la nih loh avang leh a sak a chhiat avangin MZP Sub-headquarters W. Lungdar pawhin an lo vuak chhiat tawh thu an sawi.
School chu luah tlak a nih loh avanga an luah loh avangin bialtu MLA chuan zirtirtute sawn a tum a, phone hmangin a vau niin NSUI chuan an sawi a. Dampa bialtu MLA thil tih dan chu khawtlang mipui, zirlaite leh zirtirtute zah lohna leh zirna sawpchhiat pawisak lohnaa an ngaih thu sawiin, Headmaster Roliankimi leh a thawhpui Khawlrochhunga chungah thil tha lo a thleng a nih chuan a tul ang zelin hma an la dawn tih an sawi bawk.