Chelsea chuan England forward Raheem Sterling ngaihven in Manchester City an bia a, indawrna kalpui tan an tum.
Kum 2015 a Pound maktaduai 49 a Liverpool atanga City pantu Sterling hian Citizens tan game 339 khel tawhin goal 131 a khung a. Blues neitu thar Todd Boehly hova tun nipuia player langsar lakluh an tum zinga an dah hmasak ber a ni.
Chelsea hian kum 27 mi lakluh nan hian an ngamna zat City hnenah la thlen lo mahse an inralring mek a, Sterling lei dilna hi an thehlut thuai ang.
Sterling hian Eithad Stadium-ah kum khat contract a la nei a, a club ngaiah a cham dawn nge a chhuak dawn tih a inngaihtuah mek.
England tana vawi 77 khel tawh Sterling hian team tana mawhphurhna pawimawh zawk lak a, inkhelh tam zawk a duh thu a lo sawi lang fo tawh thin a. Man City-ah hian player pawimawh zingah tel mahse Pep Guardiola hnuaiah inkhel pawimawh a bul tantu zingah a tel lo leh thin.
Chelsea hian Belgium striker Romelu Lukaku an chhuahtir dawn avangin an tlarhma thawm that an duh a, an hlawhtling a nih chuan Boehly hnuaia player an lakluh hmasak ber a ni ang.Haaland a vang?
Kum 2016 a Guardiola in City a enkawl hnuah Sergio Aguero (124) tih lova goal khung hnem ber chu Sterling a ni a, goal 120 a khung.
City a league title vawi li chawi tawh Sterling hi Guardiola hian Aguero inhliam leh a chhuah hnuah te tlarhmaah a laiah a hmang fo thin. Mahse Champions League semi-final a Real Madrid an hmachhawn tum leh league inkhel pawimawhah bench-ah a dah fo.
Spanish coach hian season tharah Norwegian striker hrim Erling Haaland a nei dawn a, ani hi rinrawl ni tura ngaih niin Sterling-a tan hmun a tlem sawt dawn a. Argentina forward Julian Alvarez an neih dawn bawk avangin mualsir lamah pawh Man City hian duhthlan tur an ngah dawn a. Hei vang hian Sterling hian a hma hun a ngaihtuah niin a lang.