Siaha-ah Birth certificate pekchhuah chungchangah Myanmar raltlan te avanga fimkhur a ngai nia hriain, nimin khan Siaha Addl. DC Donny Lalruatsanga hovin a kaihhnawih mipawimawhte an thukhawm.
Siaha district chu Mizoram district zinga Myanmar raltlan awm tamna ber an nih mek thu leh raltlan then- khat anmahni emaw, an fa te emaw tan delay birth certificate dil an awm nual tawh thu executive magistrate chuan a sawi.
Birth certificate chu nausen a pian atanga ni 21 chhunga awmna veng/khua registrar birth and death-in a pek chhuah theih a nih thu sorkar thuchhuah chuan a tarlang a. Pian atanga kum 1 chhungin DRO-in fee awm lovin a pe chhuak thei tih a tarlang.
Kum khat hnu lamah chuan executive magistrate hnenah delay birth certificate dilna thehluh theih a ni a, executive magistrate in DRO hnenah a refer leh thin. Delay birth certificate dilnaah India khua leh tui an ni ngei a ni tih a chian nan nu leh pa EPIC bakah VC, kohhran leh NGO te hriatpuina thil tel tur a ni thin. A diltu chu kum 18 aia upa a nih chuan ama EPIC bakah kohhran, VC leh NGO te hriatpuina thil tel tur a ni thin tih sorkar thuchhuah chuan a tarlang.
Myanmar raltlan ni si, an nu leh pa atana India khua leh tui, EPIC nei te hmanga kohhran,VC leh tlawmngai pawl ten India khua leh tui anga an lo hriatpui an awm tih sorkar thuchhuah chuan a tarlang.
Siaha Addl. DC hova thukhawm chuan DRO office chu fimkhur taka birth certificate pechhuak turin an ngen a, dikhlel taka birth certificate pekchhuah a nih a, man chhuah a nih leh si chuan registrar bakah a hriatpuitu VC, kohhran leh tlawmngai pawl lakah pawh dan anga hremna lekkawh theih a ni tih mitinin hria se an duh thu an sawi bawk.