AIZAWL: Serchhip district level monitoring committee-in nimin khan Serchhip district chhung NH 54 zauh hnathawh meka leivung paih dan te an enfiah a. NHIDCL hotute leh an hnuaia contractor te chu an hnathawh meka thil fel tawklo awm nia lang te an sawipui.
Khumtung atanga tanin Gawar-SCCPL (JV) ten Serchhip district chhunga an hnathawh tur chin en hmasain, hetah hian kawng kama leivung paihna (spoil bank) pahnih, a thlang lama Tuirini lui awmna chu an en hova. Monitoring committee chuan an leivung paih tumnate chu pawm theiha an ngaihloh avangin thla hnih chhunga hmantlak hmun dang lo dap turin an hrilh.
Kram Infra. Construction company te thawh chin lam en lehin, hmun hrang hranga leivung paihna tura an thlan te an tlawh a. Monitoring committee chuan NHIDCL aiawhte leh an hnuaia contractor te chu chak taka hnathawk tura an duh thu hrilhin, sorkar laipuiin ramngaw leh nungcha leh a chhehvel ramte himna atana dan a siamte tha taka an zawm a tul thu an hrilh a. Serchhip- Chhiahtlang by-pass road bikah pawh environment clearance engmah, hna tan theihna khawp phalna (in principle approval) an la nei lo chu a ranglama umzui tura hrilhin, clearance an la neih loh avangin dan anga stay order pawh pek an nih thu an hrilh bawk.
Tuna hnathawh mekteah pawh a thawh dan tur ruahman sa ang ngeia thawka, leivung paihna hmun atana thlanah chauh leivung paih ngei turte, an leivung paih tawhna kalsan ngaite pawh mumal taka a dawlna rinawm tak siam hmasa lo chuan chhuahsan an remtihloh thute an hrilh bawk a ni.