Aizawl: Tui lian avanga tui thianghlim in tura harsatna tawk mek, Silchar tan Mizoram atangin tui in tur pek chhunzawm zel a ni a, Mizoram sorkar tirhin truck eng emaw zatin tui an phur thla a, Central YMA-in a thawh hnihna atan tui litre 12,000 chuang a thawn belh leh bawk.
Mizoram sorkar ruahmannain nimin khan motor pangain Vairengte atangin Silchar-ah tui thianghlim an phur thla a, Sonai Circle Office lamin a sem dan turah ruahmanna an lo siam thung a ni.
Central YMA chuan a thawh hnihna atan nimin khan Silchar-ah tui thianghlim an thawn leh a, tui an thawn lehte hi Aizawl khawpui chhunga branch YMA 21-in case 818 an thawhkhawm leh pawl dang leh mi malin case 205 an thawhkhawm, a vaiin case 1,023, litre 12,276 a ni.
Tui thawhkhawm a nih bakah hian YMA branch thenkhat, tui thawhkhawm remchang lo branch 14-ten Rs. 50,300 leh mi mal, pawl leh kohhranin Rs. 52,200 an thawhkhawm bawk a, heng pawisate hi Silchar Br. YMA hnenah hlan tura ruahman a ni.
Tui thianghlim in tur litre 12,276 chuang hi Central YMA lirthei leh branch pariatin lirthei an thawhkhawm, lirthei 11 hmangin nimin zing dar 9 khan Aizawl atangin Silchar panpui a ni a, Silchar-ah Cachar DC aiawhin sorkar mi pawimawhten an lo dawng.