San Antonio, Texas, United States daia a khalhtuin a kalsan truck chhungah mi 46 vel ruang chhar a ni.
Fire thuneitu chuan naupang pali telin mi 16 chu damdawi inah lak an ni bawk tih a sawi.
Dam chhuakte hi lum lutukin a tihbuai niin khaw lum uchuak tak leh taksa thlan nasa lutuk avanga tui tlachham an ni tih a sawi.
San Antonio hi US-Mexican ramri atanga km 250 vel chauhva hla niin sumdawnna atana mihrilh tawlh leh pem tum pangngaite pawhin a ruka ramri an kânna hmun langsar tak a ni.
Mihring hralha sumdawng thinte hian lehkha pawimawh engmah nei lote phurh nan truck an hmang nasa thin hle a. Hmun biru laiah hlangin thenawm ram atanga ramri kânin US an luhpui ru thin.
“Chhungte nei ve tho an ni hlawm a, nun nuam zawk hmuh beiseite an ni hlawm,” tiin San Antonio Mayor Ron Nirenberg chuan a sawi a. “A rapthlak mai a ni lo va, mihring mit atanga thlirin lungchhiatthlak tawp a ni,” a ti.
Rikrum thila che chhuak thinte chuan a hmun hi Thawhtanni zan dar 6:00 (India rama Thawhlehni zing dar 4:30) hnuah ruang hmuh thu an dawn bawhzuiin an thleng tih San Antonio fire chief Charles Hood chuan thuthar lakhawmtute a hrilh.
“Ruang eng emaw zat hmu lovin truck hi kan hawng kher lo vang, hetiang a ni ang tih kan ring pha lo,” a ti.
Truck hi a khalhtuin a kalsan a ni a, air condition tha a awm lo va, tui in tur pawh a awm lo tih a sawi.
San Antonio-ah hian nipui lai chuan khua a lumin Thawhtanni pawh khan 39.4°C a kai a. Thite pawh hi khaw lum lutuk leh tui tlakchham vanga thi nia ngaih an ni.
Mexico Foreign Minister Marcelo Ebrard chuan damdawi ina lak zinga pahnih chu Guatemalan an nih thu a sawi a. Thi leh mi dangte hi eng ram mi nge an nih hriat a ni hlawm lo.
He thilah hian mi pathum hren an ni tawh a, sorkar laipuia thil chhuitute kutah a chhui hna dah nghal a ni.
Mexican Consul General Rubén Minutti chuan a aiawh tir nghalin San Antonio-a an consulate chuan thi zingah Mexican an awm phawt chuan a tul ang zawng zawng an buaipui tur thu a sawi.
San Antonio khawpui chhim lam hla takah hian kawngpui lian tak pahnih kalin hei hian Texas-a ramri khuate a pawh hlawm a, thenawm ram atanga luh ruk tumte tan khân remchang tak a ni.
A bikin thingtlang lehzualah, dai hnai hmun remchang tak takah truck lian thuhrukna mai tur remchang pawh a la tam a, hei hi remchang atan an hmang nasa hle bawk.