Hachhek biala khaw hrang hranga kuhva chingtuten Zamuang khaw daia Myanmar atanga dan lova Mizoram lak luh kuhva rah bag eng emaw zat an lo man chu mi tu tih hriatlohten nimin khan an hal.
Zamuang atanga thudawn danin dan lova Myanmar kuhva rah tawlh chuan Hachhek biala kuhva chingtute harsatna a thlen nasat avangin Hachhek Bial Kuhva Chingtu Pawl (HBKCP)-in an huam chhung paltlanga dan lova tawlhte chu dan tumin an duty a. Nimin zing lam dar 1 vel khan Burma kuhva ro bag 285 phur truck chu Zamuang khuaah an man a, thuneitute hnena hlan dan tur ngaihtuaha HBKCP hruaitute an thutkhawm laiin kuhva rah ro an mante chu mi tu tih hriat lohten an lo hal nia thudawn a ni.
Thudawn danin kuhva rahte hi Tripura katlanga Assam-a phurh luh tur a ni a. A rah haltute chuan truck atanga hlang thlain an hal a, a phurtu lirthei tihchhiat a ni lova a, driver pawhin kut a tuar lo bawk.
Hachhek biala kuhva chingtute chuan Myanmar atanga dan lova kuhva lakluh chuan harsatna nasa tak a siam mek tih sawiin, tunhmaa awlsam taka an kuhva tharte an hralh thin laiin tunah chuan Burma kuhva chu Kanhmun lam atanga Assam lama a luhthlak thin avangin Assam lamin tualchhung thar ngei pawh Burma kuhvaa puhin an lo mansak zel niin an sawi.
Kum dangah chuan June thlaah phai lam sumdawngten anbial chhunga kuhvate an lei thin tawh laiin, kuminah chuan Burma kuhva a kal reng avangin harsatna tawh an hlau a, an lei ngam ta mang lo niin Hachhek biala kuhva chingtu pawl chuan an sawi a. Nikum lamah pawh Burma kuhvate dang turin tlaivarin an lo duty tawh thin niin an sawi bawk.