Assam tui lian avangin hun rei tak chhung Mizoramah mipui mamawh bungraw lak luh a khaihlak a, kar hmasa khan Vairengte gate paltlanga lirthei lut 80 bawr vel chauhte a awm a, Thawhlehni atang khan boruak that laia lirthei lut thin zat a rawn lut tawh.
Lei minin Assam ram chhunga rel kawng leh kawngpui a tihchhiat avangin June thla tir lamah tuialhthei chawk luh a khaihlak a, hemi hnua Meghalaya ram chhunga kawngpui chhiain harsatna thlen belhin kar hmasa lama Assam ram chhunga tui lian nasain harsatna hi a belh chhah chhunzawm.
June 20 khan Vairengte gate paltlangin lirthei 84 chauh Mizoramah a rawn lut a, hemi kartluan hian lirthei lut a tam lo a, mipui mamawh bungraw phur ngat phei chu a tam lo leh zual a, hemi avang hian Mizoramah chawhmeh man a to phah.
Silchar khawpui tui lian a ziaawm a, Thawhlehni atangin Assam atanga Mizorama lirthei lut tam tanin, June 28 zing dar 8 atanga June 29 zing dar 8 thlengin Vairengte gate patlang lirthei 420 a awm tawh a, hei hi hun pangngai state pawn atanga lirthei luh dan tlangpui a ni bawk.
Darkar 24 chhunga Mizorama lirthei lut zinga 19 chu gas phur an ni a, 19 chu tuialhthei phur an ni a. Lirthei lian dang lut pawh 100 tel a ni a, lirtheite hi mipui mamawh, chawhmeh leh bungraw dang phur an ni.
Mizoramah tuialhthei phurh luh a khaihlakna a rei tawh avangin filling station hrang hrangin petrol leh diesel pek tur an neih mumal tawh loh hnuah Vairengte-a IOC Depo nghaktute chuan tank lorry 30 chuangin Guwahati-ah load lain Mizoram an pan mek tih an sawi.
Nimin khan tuialhthei phur tank lorry 10 vel chu Vairengte-ah a thleng tawh tih leh Mizoram hmun hrang hranga dah turin challan siam fel a ni tawh tih an sawi a, engkim a kal dan pangngaia a kal theih tawh avangin tuialhthei a harsatna pawh a ziaawm vat an beisei.