Aizawl: Khawvel pum huapa ruihhlo hman sual leh tawlh ruk dona ni pualin nimin khan Assembly House Annex Conference Hall-ah hun hman a ni a, khuallian Chief Minister Zoramthanga chuan nasa takin ruihhlo do beihpui thlak a tul tih a sawi.
Chief minister chuan ruihhlo dona kawnga hmalakna awm tawhte chu fakawm a tih thu a sawi rualin nasa taka beihpui thlak a tul thu sawiin, “Khân hrang hrang atangin theihtawp chhuaha beih a tul a, zirlaiteah inzirtirna ngawrh taka kalpui a tul,” a ti.
Mizo chu ‘regimented society’ a nih avangin hun reilo teah zirtirna tha nen, faina chungchangah pawh nasa takin hma an lo sawn tawh ang bawkin ruihhlo do kawngah pawh hmasawnna a awm theih ngei tur thu chief minister chuan a sawi.
Sethawna ruihhlo ngaite enkawlna hmunpui buatsaih mek chungchang sawiin, “He lai hmun hi sorkar department pakhat chauh kuta awm mai ni lovin, tanrualna nena tangkai taka hman tura duan a ni,” a ti.
Ruihhlo ngawl vei leh a kaihhnawih harsatnate avangin Mizoram chu langsar mah se vanduaina chu malsawmnaah chantirin, a do kawngah leh ruihtheihthilin a tihbuaite enkawlna kawngah thawh that avanga entawntlak a la ni thei tih sawiin, “Chumi atan chuan kan zavaia kan theih chin theuh a, rilru nghet tak pu chunga theihtawp kan chhuah a tul,” tiin a sawi.
Ruihhlo hman sual leh a tawlh ruk dona ni puala hun hman hi Social Welfare & Tribal Affairs Department Secretary Arun Mishra chuan kaihruaiin, khualzahawm, Social Rehabilitation Board Vice Chairman K. Liantlinga’n thu a sawi bawk.
He hunah hian ruihhloin a tihbuaite enkawl kawnga hnarkaitu thi tate leh ruihhlo zawrhna do hna an thawh laia nunna chân tate sunna hun hman a nih bakah ruihhlo do kawnga thawkte chawimawina neih a ni.
Supply Reduction Category-ah CYMA, Excise & Narcotics Department, Mizoram Police leh 2nd Assam Rifles Bn te chawimawina pek anni a, Harm Reduction category-ah Grace Home, Mizoram SYNOD leh Shalom hnena chawimawina pek a nih bakah Demand Reduction category hnuaiah mi paruk hnenah chawimawina hlan an ni bawk.