Maharashtra-ah hian tangrual sorkara a hmuipuipu ber, Sena chhunga buaina awm chuan chawlhkar khat chuang a awh hnuah governor chuan Thackeray-a chu a sorkar buk turin a hriattir ta a. Hei hi court-ah an khing let nghal.
Sena chief whip Sunil Prabhu chuan larsap thupek hi Supreme Court-ah thlenin advocate hlun tak, Abhishek Manu Singhvi chuan an ai a awh dawn a, court hi chawhma dar 10:30-a hawn chauh thin a ni a, thu hi hmanhmawh taka ngaihtuah a ngaih avangin Nilaini tlaiah ngaihtuah nghal a ni.
Justice pahnih, Surya Kant leh JB Pardiwala te chuan larsap thupek hnialna thu hi a ngaihtuah leh dawn a. Anni awmna bench tho hi deputy speaker-in MLA hel zinga mi 16-te an nihna hlihsak a tum khinna lo ngaihtuahtu kha niin July 12 thleng MLA hel zinga nihna hlihsak tumte hi insawi fiahna hun an pe.
Sena MP Sanjay Raut pawhin Nilaini tukah khan larsap thu hi Supreme Court-ah an thlen tur thu a lo sawi tawh bawk.
“MLA 16-te nihna hnawlna tur thu Supreme Court-in July 11 hma zawng ngaihtuah rih lo tura a tih laiin engtin nge sorkar buk theih a nih ang?” tiin Sena MP Priyanka Chaturvedi-i pawhin Twitter-ah a tar lang.
“Court-in thu a la tihtluk hmaa sorkar buk chu court thu zawh lohna a ni,” a ti bawk.
Larsapin sorkar buk tura thutkhawm a kohvah hian live-a tihchhuah turin a ti a, Vidhan Sabha Secretariat kaltlangin mi dangin video thla an la vek tur a nih thu a sawi a. “Vote thlak zalen tak a nih theih nan vote chhiar laiin member-te chu an ding tur a ni,” a ti bawk.
MLA hel mek hruaitu, Shinde chuan MLA 50 dawn thlawpna nei niin a insawi a, an zinga 40 vel chu Sena an ni a. Member 287 awmna rorelna inah hian chak zawk turin member 144 neih a ngai.
Sena, Congress leh Sharad Pawar-a kaihhruai Nationalist Congress Party (NCP) tangrual sorkar hian a pum puiah MLA 152 an nei a. Tuna hela inkulh hrang mekte hi an awm loh dial a nih chuan sorkar hian tam zawk nihna an hauh phak dawn lo a ni.