November ni 21 khian Qatar-ah World Cup khelh tan a ni dawn a, World Cup enna tur ticket eng emaw zat hralh tawh a ni a. Kar leh khian ticket nuai hnih zawrhchhuah a ni leh dawn. World Cup en tum tan ngaihven ran chi a ni ang.
FIFA World Cup enna tur hian maktabuai hnih chu a nawlpui tan lei theih turin siam a ni a. Tum hnih zawrh chhuah a lo ni tawh a, 1.8million zet hralhchhuah a ni tawh a. Hralh bang la awm nuai hnih hi karleh ah zawh chhuah a ni leh dawn a, thawhlehni atangin a lei theih dawn. Ticket lei turah duhsak bik an nei dawn lova, a intlar hmasa sa in an chang mai dawn tih Fifa lam hian an sawi chiang nghal bawk. Ticket lei tum zingah Argentina, Brazil, England, France, Mexico, Qatar, Saudi Arabia leh United States mi an tam fal niin Fifa hian a tarlang bawk. Ticket lei tawh zingah India chu lei tam zingah an tel ve teh tlat thung.
Tarlan tawh angin World Cup enna tur ticket hi a nawlpui tan maktaduai hnih siam a ni a. Maktaduai khat leh nuai riat hralhchhuah tawh niin, nuai hnih a la bang a. A nawlpui tak 2million an siam bakah hian World Cup sponsor tu leh official neuh neuh tan 1.2 million an ruahman bawk. Ticket an hralh leh tur hi July ni 5, Thawhlehni zing dar 10:00 atangin Fifa Website-ah zawrhchhuah a ni ang. Group Stages ah bik World Cup ticket man tlawm ber hi £8 a ni a. India pawisa chuan Rs. 769.11 a ni. Hetihlai hian final enna ticket manto ber ber £1,223 a ni ve thung a. India pawisa chuan Rs.1,17,555.03/- zet a ni ve thung.