Maharashtra-a sorkarna fawng vuantu, Shiv Sena chhunga buaina a la reh lo va. Hela Assam-a inkulh an MLA rualte chu an awmna chhuahsan tur angin chhuak vek tawh mah se an let leh.
Guwahati-a khualbuk changkanga Eknath Shinde-a hova inkulh mekte hian Nilaini khan Kamakhya temple tlawha Goa pan tumin an chhuak a; mahse, an state assembly-a Uddhav Thackeray-a sorkar buk tura tihna sorkarin hniala Supreme Court-a thu a thlen leh hnuah an kir leh a. Court hian Nilaini tlai khan hnialna thu thlen hi a ngaihtuah nghal a, a thutlukna azira che chhuak turin thlawhna inrintir sa a ni.
Shinde chuan Guwahati-ah, “Naktukah Mumbai kan thleng ang. MLA 50 kan ni a, hmun thuma thena hmun hnih kan ni a. Bukna engpawh kan cho va, kan paltlang ang a, engmahin min dal lo vang. Mipui rorelnaah chuan a tam zawk thu ang zelin thil kalpui a ni thin,” a ti.
Radisson Blu Hotel-a an inkulhna atangin MLA helte hi temple panin an chhuak a, venhimna pawh khauh taka kalpui a ni a. SpiceJet hmangin tlai lamah vaukam state pan tura tih an ni.
Temple tlawhnaah hian Assam Parliamentary Affairs Minister Pijush Hazarika leh state BJP hruaituten Maharashtra MLA helho hi an tawiawm.
Goa-ah hian Taj Resort & Convention Centre-ah inkulh zui tur anga sawi a ni a, pindan 70 chu hauh a ni.
Goa hi BJP rorelna a ni a, Mumbai atangin a hnai bawk a, Ningania Chief Minister Thackeray-a sorkar buk tura special assembly session kohva inlan tur pawhin awlsam takin an inlan phak dawn a ni.
Governor Bhagat Singh Koshyari chuan chief minister hi Ningania sorkarin rintawk a hlawh leh hlawh loh tichiang turin a ti a. Assembly Secretary Rajendra Bhagwat hnenah chawhma dar 11:00-ah special session ko turin a hriattir.