Meghalaya Police chuan an state-a dan lova lungalhthei hralh chhuahnaa bul tumtu ber leh coal mafia hruaitu ber nia an hriat, Abdul Ahad Choudhury chu Ri Bhoi district-a Nongpoh-ah an man.
Choudhury hi East Jaintia Hills (EJH)-a police thuhnuaiah a awm mek a, EJH-a Khliehriat police station-a thubuai a lo neih tawhah pawh thu zawh fiah mek a ni.
Police-te hian Karimganj district (Assam)-a Sutarkandi-a cheng, Choudhury hi Meghalaya atanga Barak Valley, Assam-a a ruka lungalhthei phurh chhuahnaa a bultumtu ber niin an hria.
Ri-Bhoi Superintendent of Police S.P.N. Kamare chuan Chodhury an man ngei thu hi a sawi a. “Nongpoh atangin Nilaini khan man a ni,” a ti.
“Khliehriat-ah thubuai nei sa a nih avangin Choudhury hi Khliehriat police hnenah hlan nghal a ni,” a ti.
EJH Superintendent of Police Deepak Kumar Palecha pawhin Nongpoh police station atangin Khiehriat-ah an lak thu a sawi ve bawk.
“Kan custody-ah a awm mek a, chhui hna thawh zawh a nih hunah a kimchang ka hrilh ang che u,” tiin thuthar lakhawmtute a hrilh.
Meghalaya-ah hian dan lova a ruka state pawna lungalhthei hralh chhuah a awm tih thu a tlang than hnuah Choudhury hi hun eng emaw chen a awm bo va, thenkhat phei chuan a thi tawh a nih an ring hial.
Tun hnaiah dan lo bawka Meghalaya atanga Barak Valley-a lungalhthei phurh chhuah a awm thar leh bawk.
Tual chhung miten Barak Valley chhehvelah a phurtu truck tam tak lo dapin an dang a. Truck eng emaw zat chuan an lo phur ngei a, lehkha pawimawh nei lo pawh an awm.