Mizoram Milk producers’ cooperation union limited (MULCO) hnuaiah affiliated society 53 an awm mek a, society 53-ah hian member 742 awm mekin, heng zinga mi 195 ten MULCO-ah Bawnghnute an chhung mek a. MULCO hnuaia society member te Bawng vulh zawng zawng 480 a ni.
MULCO hi AH & Vety department hmalaknain January ni 5, 1983 ah din a ni a, June ni 5, 1984 ah Mizoram cooperative act hnuaiah ziahluh niin, Cooperative act hnuaiah hian mahnia ro inrelin a awm a, Mizoram pum huap tura duan a ni.
Khua/veng hrang hranga Primary society te khaikhawmtu niin, March ni 21, 1995 ah AH & Vety department hnuai atanga indangin amahin a ding hrang ve ta bawk.
MULCO hian nimin khan Bawngkawn South YMA Cultural centre-ah annual general meeting neiin, Cooperation Minister C. Lalrinsanga'n a telpui a. Covid-19 vanga harsatna a thlen chhungin Bawng vulhtu ten bawnghnute atanga an sum hmuhin kumdang a phak loh thu leh ran vulh population pawhin a tawrh thu sawiin, pawi a tih thu a sawi bawk.
Mizoram state agriculture horticulture forestry & marketing cooperative federation ltd. (MAHFED) pawhin nimin vek khan Aijal Club-ah general body meeting neiin, Cooperation Minister C. Lalrinsanga'n a telpui a. Sorkar flagship programme hnuaiah Vaimim leh Bekang kalpui mek a nih thu leh Vaimim Mt 5000 thar beisei a nih thu a sawi.
Cooperation Minister chuan OP12 bio-fertiliser siama zau zawka hman tum a nih thu pawh sawiin, Tualte, Lunglei leh Mizoram hmun dang 12-ah Cold storage siam tum mek a nih thu pawh a sawi a. Thlai chi pawh phai atanga lak luh ngai lova Mizoram ami ngei hman a nih zel theihna turin sorkarin theihtawp a chhuak mek tih a sawi bawk.
MAHFED Ltd-ah hian affliated member 115 an awm mek a, kum 2021-2022 an sum dinhmun Rs. Rs.27, 402, 795.83 a ni.