- Ruata
Mahindra SUV lar ber ti ila kan sawi sual tam awm lo ve, Mahindra Scorpio chu a chi thar New Generation 2022 Scorpio N a lo chhuak ta a. Hei hi rei tak ramchhunga thawm nei tawh, he huangah pawh hian kan thailan fo tawh a ni a, a tawpah chuan mawi si, changkang bawk si, man to lutuk bawk si loin Mahindra chuan an rawn tlangzarh ta a, ex-showroom mani Rs. Nuai 11.99 atangin a intan dawn a ni.
Mahindra chuan Scorpio N an tihchhuah avang hian tuna chhuak mek Scorpio chu an tihtawp phah dawn chuang lo a, Scorpio Classic tih hming puin a la chhuak reng dawn tho a ni. Scopio chhuak thar Scorpio N hi customer ten an enchhin theih turin ramchhungah dealership hrang hrangah thla thar ni 5 atangin an phochhuak ang a, ramchhunga khawpui thlan bik 30-a dealer-ah te thla thar vek ni 15 atangin a khalh chhin theih dawn bawk a ni. Booking erawh chu thla thar ni 30 atangin a tih theih ang a, a kal hmasa sa in an book hmasa zel thei ang a, a lirthei pekchhuah erawh customer te a variant an thlan dan azirin a reiin a rei lo dawn thung a ni.
A MAN LEH A CHI HRANG AWM TUR
Mahindra Scorpio N hi trim level 5 – Z2, Z4, Z6, Z8 leh Z8L te a awm dawn a, hemi hnuaiah hian variant chi hrang hrang 36 lai a awm dawn a ni. Petrol variant chi 13 a awm ang a, diesel hmang chu chi 23 a awm thung dawn a ni. Tuna Scorpio chhuak mek pawh Scorpio Classic tih hming puin design lamah tlem tidanglamin a chhuak zui zel ang a, trim level pahnih S3+ leh S11 a awm ang a, mi 7 leh 9 thut theih te duhthlan turin a awm dawn bawk a ni.
Petrol manual ho hi Rs Nuai 11.99 atanga 18.99 man inkarah a awm ang a. Diesel hmang ho chu Rs Nuai 12.49 lakh – 19.49 man inkar a ni thung dawn a ni. Company lam hian an Four Wheel Drive model bik hi a man tur an la puangzar lo a, Scorpio N AT leh 4WD variant bik chu July 21, 2022 ah an puangzar dawn a ni.
Scorpio tharah eng nge kan hmuh
New Generation 2022 Mahindra Scorpio-N hian design thar diai a nei a, a chhunglam pawh a hmaa Scorpio chhuak nen a inang lutuk lo a, a design a tunlai viau a, a chhung leh a thil chhawm hrang hrang pawh tunlai leh changkang tak tak vek a ni.
A khawl lamah chuan khawl chi hnih – 2.0-litre mStallion turbocharged petrol leh 2.2-litre mHawk turbo-diesel te a awm a. Petrol zawk hian 200PS power leh 370Nm torque chu manual gearbox a hmanin a pechhuak thei a. Automatic gearbox hmangah chuan a torque hi 380Nm a ni thung a ni. 2.2L diesel khawl hi chi hnih – 132PS power leh 300Nm torque pechhuak thei a awm a, hei hian 6-speed manual gearbox a nei a. Hei bakah hian 175PS power leh 370Nm torque pechhuak thei manual gearbox hmang leh power ngai bakah 400Nm torque pechhuak thei, automatic gearbox hmang a awm bawk a ni. Petrol hmang ho hi a ke hnung phih kal, rear-wheel drive a ni vek dawn a, diesel hmang ho hi rear-wheel-drive bakah four-wheel-drive a awm tel dawn a ni.
Scorpio N hian shift-on-fly 4WD system tha tak mai, low leh high range gearbox a nei dawn a. Hetah hian offroad-a tlanna atanga tangkai tak tur – mechanical rear locking leh front brake locking differential a nei dawn bawk a ni. 4×4 variant ho bik hi Mahindra Scorpio N 4Xplorer tih hming an vuah bik a. He SUV thar hian off-road mode pali – Mud, Sand, Grass leh Snow a nei dawn bawk a ni. Suspension lamah chuan a hmalamah independent unit leh a hnungah penta-link a nei dawn a. FSD (Frequency Selective Damping) damper a nei bawk a ang a, hei hi Mahindra XUV700-ah pawh kan hmuh tawh ang a ni.
A len zawng
Mahindra Scorpio N hi a dung, a vang leh a san zawng, a indawt danin 4,662mm, 1,917mm leh 1,857mm te a ani dawn a. A wheelbase hi 2,780mm a thui a ni dawn bawk a ni. Ke chi hnih 17 leh 18-inch te duhthlan tur a awm dawn bawk a ni. Scorpio N hi Scorpio chhuak mek nena khaikhin chuan 206mm in a sei zawk ang a, 97mm in a hlai bawk ang a, 125mm in a hniam zawk dawn bawk a, a wheelbase hi a hma aiin 70mm in a thui zawk a ni.
A chhung leh kentel
6 leh 7-seater te duthlan tur a awm dawn a, 6 seater zawkah hian a lai tlar chu captain seat a ni dawn a ni. A tlar hnung berah thutnaah chuan 6 seater-ah hian 50:50 seat split function a awm ang a, 7-seater-ah chuan 60:40 split function a nei thung dawn a ni.
He SUV thar hian dual-projector headlamps, sequential turn indicator awm tel, C-shaped LED DRL, vertically-stacked signature LED tail-lights leh dual-tone 2-spoke alloy wheel te a nei thar dawn a. A kentel hrang hrang turte height adjustable seat belt, ventilated front seats, electrically adjustable driver seat with lumbar support, Bosch atangin AdrenoX 8-inch touchscreen infotainment system, Alexa connectivity, connected car tech, Sony atangin 12-speaker system, 3D sound staging awm tel, electric sunroof, LED cabin light, semi-digital instrument console, dual-zone climate control, wireless charger leh thildang a tel dawn a. Himna lamah chuan airbag a awm nual dawn bakah, cruise control, 360 degree camera, traction control, tyre pressure monitoring system, hill descent control leh a dangte a awm dawn bawk a ni.