India hmar lam, Rajasthan-ah Hindu pa pakhat lu tansak a ni a, hei hian sakhuana thila inepna lian tak a thlen mek.
Mi thah hi puanthui, Kanhaiya Lal niin Udaipur district-ah Thawhlehni khan Muslim mipa pahnihin an thah a, an che vel lai hi thla laiin online-in an thehdarh zui.
Hetianga an tih chhan hi tun hnaia politician pakhatin Prophet Muhammad-a a sawihnawmna thlawpna a lantir avanga phuba an lakna niin an sawi bawk.
Sorkar chuan buaina lian zawk a chhuah loh nan internet service a titawp nghal a, punkhawm a khap bawk.
Police-te chuan mipa pahnih an man tawh a, video-a langte chu an ni ngei tih anmahni an inpuang tawh.
Video dangah Hindu laka chetna an fakna thehdarh bawkin Prime Minister Narendra Modi-a chuan hma a la vat lo a nih chuan a tan a hlauhawm theih thu an sawi bawk.
Rajasthan police hotupa chuan chanchinbute chu tualthahna video chu ‘a rapthlak em avangin’ tichhuak lo turin a ngen.
Rajasthan Chief Minister Ashok Gehlot chuan mipuite chu zawldawh taka awma buaina siam lo turin a ngen.
Sorkar laipui chuan a hnuaia firfiaka chetna chhuitu, National Investigative Agency chu thil thleng chhui chiang turin a hriattir nghal bawk.
Thil thleng chu party hrang hranga politician hlun tak takten an dem thu an sawi hlawm.
Rajasthan chief minister hlui, BJP hruaitu, Vasundhara Raje-i chuan Gehlot-a kaihhruai, Congress sorkar demin an hnuaiah hian an state-ah ‘chi leh chi leh sakhaw thila buaina a pung’ niin a sawi.
BJP hruaitu thenkhat chuan Delhi-ah he tualthahna duh loh lantir nan kawng zawh an huaihawt dawn tih an sawi bawk.
Congress hruaitu, Rahul Gandhi chuan tualthahna thlengin a barakhaih thu leh a titute chu rang taka hremna pek a phut tih a sawi.
Muslim pawl lar tak takte pawhin an dem a. All India Muslim Personal Law Board chuan na taka an dem thu sawiin, India leh Islamic dan bawhchhiatna a nih thu an sawi.
“Tumahin dan hi anmahni thuin an kengkawh thei lo va, hetiang pawikhawihna leh tualthahna phei chu a demawm tak zet,” tiin thu an chhuah.Thla thum hnuah 40,000 hnuai
Video-a a lan dan chuan tualthattu pahnih hi Lal-a dawrah hian dawrtu pangngai anga lutin a teh vel laiin an bei ta a ni.
An mi thah hian a hmain social media-ah BJP thupuangtu thin, Nupur Sharma-i’n thla hmasaa Prophet Muhammad-a a sawina chu a thlawp thu a lo tar lang tawh nia sawi a ni.
Sharma-i’n TV-a thil sawihonaa Prophet a sawi dan hi Islam ramten huain India nen pawh an inkar a chhiat phah tep a. Party-in a nihna atangin an chawlhtir rih nghal.
A thu sawi avang hian India-ah pawh buaiin tharum thawhna a thleng nasa a, lunga intawng leh vantlang thil tihchhiat a tam hle.
Thah a nih hma chawlhkar thumah Lal-a pawh hi sakhaw dang a sawi dan avangin police-in an lo man tawh niin Indian Express chanchinbu chuan a tar lang a. A chhuah hnuah pawh a nunna atan a hlauhawm avangin police venhimna a dil.
Police chuan Hindu leh Muslim thenkhat kova an inbiak hnuah Lal-a pawh hi venhimna pek loh a ni tih chanchinbu chuan a tar lang.