Footballer chawimawina ngaihhlut hlawh ber chu Ballon d'Or a ni a. French magazine 'France Football' bul tuma semchhuah thin a. 'France Football' in hun rei tak chhung an mahni puala an semchhuah hnuin kum 2010 atanga 2015 chhung khan FIFA nen an thawk dun a. Kum 2016 atang khan French Magazine hian an mahniin an kalpui zui leh ta thung. Tunah chuan eng lam player ten nge Ballon d'Or dawng hnem tih kan tarlang ang.Real Madrid
Khawvela football club hausa leh hlawhtling ber, an player duh zawng apiang nei theih hiala ngaih ni thin Real Madrid player pasarih ngawtin Ballon d'Or an dawng tawh a. Cristiano Ronaldo-an vawinga ngawt a dawn bakah Alfredo Di Stefano-an vawihnih a dawn tawh bawk vangin Real Madrid player ten Ballon d'Or an dawn zawng zawng hi 11 a ni.
Real Madrid atangin Ballon d'Or dawng tawhte: Alfredo Di Stefano (1957, 1959, ), Raymond Kopa (1958), Luis Figo (2000), Ronaldo (2002), Fabio Cannvaro (2006), Cristiano Ronaldo (2008, 2013, 2014, 2016, 2017) leh Luka Modric (2018) te an ni a. Kumin hian Karim Benzema-an a dawn ngei a rinawm viau a, Real Madrid in Ballon d'Or dawng thei an neih belh tura ngaih a ni.FC Barcelona
Barcelona hian Lionel Messi an neih miau vangin an hmelma lian ber Real Madrid aiin Ballon d'Or an kawl tam zawk a, an player te dawn zawng zawng hi 12 a ni tawh. Hetihlai hian Real Madrid aiin Ballon d'Or dawng thei an nei tlem zawk thung a, an player parukin Ballon d'Or an dawng tawh.
Barcelona atanga Ballon d'Or dawng tawhte: Luis Suarez (1960), Johan Cruyff (1973, 1974), Hristo Stoichkov (1994), Rivaldo (1999), Ronaldinho (2005), Lionel Messi (2009, 2010, 2011, 2012, 2015, 2019)Juventus
Italian Serie A club lian Juventus player paruk ngawtin Ballon d'Or hi an dawng tawh a. Ballon d'Or an dawn belh khawm hi pariat a ni ve thung.
Juventus player Ballon d'Or dawng tawhte: Omar Sivori (1961), Paolo Rossi (1982), Michel Platini (1983, 1984, 1985), Roberto Baggio (1993), Zinedine Zidane (1998) leh Pavel Nedved (2003).AC Milan
Italy ram chhung mai ni lova, Europe-a football club hlun leh ropui ber pawl ni thin AC Milan player zingah Ballon d'Or dawng thei paruk an awm tawh a, Juventus ang thoin Milan player te Ballon d'Or dawn zawng zawng hi pariat a ni.
AC Milan player Ballon d'Or dawng tawhte : Gianni Rivera (1969), Ruud Gullit (1987), Marco van Basten (1988, 1989, 1992), George Weah (1995), Andriy Shevchenko (2004) leh Kaka (2007).Manchester United
English Premier League club lian leh hausa Manchester United player zingah Ballon d'Or dawng thei player pali an awm tawh a. Ballon d'Or an dawn zat hi pali chiah a ni bawk.
United player Ballon d'Or dawng tawhte : Denis Law (1964), Bobby Charlton (1966), George Best (1968) leh Cristiano Ronaldo (2008)Bayern Munich
German club ropui Bayern Munich player zingah Ballon d'Or dawng thei mi pathum an awm tawh a, Ballon d'Or an dawn belhkhawm hi panga a ni thung.
Bayern Munich player Ballon d'Or dawng tawhte : Gerd Muller (1970), Franz Beckenbauer (1972, 1976) leh Karl-Heinz Rummenigge (1980, 1981)Inter Milan
Italian Serie A club lian Inter Milan player zingah mi pahnihin Ballon d’Or hi vawikhat ve ve an dawng tawh a. Inter Milan palyer Ballon d’Or dawng tawhte chu Lothar Matthaus (1990) leh Ronaldo (1997) te an ni.
Inter Milan ang tho hian Ukrainian club lian Dynamo Kyiv chuan Ballon d'Or dawng thei player pahnih an nei ve teh mial a. An player zinga Ballon d'Or lo dawng tawhte chu Oleg Blokhin (1975) leh Igor Belanov (1986) te an ni.
Football a mimal chawimawina sang ber ang hiala ngaih Ballon d'Or hi La Liga a khel player ten vawi 23 ngawt an dawng tawh a, hei hian La Liga ropuizia a tilang thei hialin a rinawm. La Liga a khel ten vawi 23 ngawt dawng tawh mahse club lian fal pahnih Real Madrid leh Barcelona atang chiahin Ballon d'Or dawng thei an awm a. Hetihlai hian Italian Serie A club pathum; Juventus, AC Milan leh Inter Milan atangin Ballon d'Or dawng thei an awm ve thung a. Hei hian Italian Serie A club te that rualzia a lantir theiin a rinawm ve thung. Lionel Messi, Neymar leh Kylian Mbappe te khelh mekna French Ligue 1 atangin Ballon d'Or dawng an la awm lo tlat thung.