India ramah coronavirus kai hmuh an pung chhunzawm zel a, a kai enkawl lai pawhin mi nuai a kai leh ta.
Darkar 24 liam ta chhung khan mi 18,000 chuang a kai hmuh niin hei hi ni 130 zet hnua a tlin leh vawi khatna a ni a. Mi 4,34,52,164-in an kai tawh tih union health ministry chuan a sawi.
Ni 122 zet hnuah a kai enkawl lai pawhin mi nuai khat a tling leh ta a. Darkar 24 liam ta chhungin mi 18,819-in an kai tih hmuh niin mi 39-in an thihpui leh hman a, mi 5,25,116-in an thihpui tawh a ni.
Hri kai enkawl lai hi a kai hmuh tawh zat atanga chhutin 0.24% an ni a, mi 1,04,555 an ni a; 98.55% erawh enkawl dam leh tawh an ni.
Darkar 24 liam ta chhung hian enkawl dam aiin a kai hmuh an tam zawk avangin mi 4,953-in an pung leh hman.
Darkar 24 liam ta chhung hian sample endik zinga 4.16% chuan an kai tih hmuh niin chawlhkar khat liam ta chhunga endik zinga 3.72%-in an kai bawk.
Hri kai enkawl dam tawh zawng zawng hi mi 4,28,22,493 an ni tawh a, 1.21%-in an thihpui tawh thung.
Ministry-in a chhinchhiah dan chuan vaccine dose vaibelchhe 197.61 pek an ni tawh.
Darkar 24 liam ta chhunga Covid vanga thi chhinchhiah mi 39 zinga 17 chu Kerala-a mite an ni a. Maharashtra-ah mi pasarih, Uttar Pradesh-ah mi pali, Punjab-ah mi pathum, Haryana, Karnataka leh West Bengal-ah mi pahnih theuh leh Delhi leh Sikkim-ah mi pakhat ve ve an thi.
Health ministry chuan Covid vanga thi zinga 70% chuang chu natna benvawn nei niin an sawi.